I listi prisenti à l’Elezzioni Tarrituriali di ghjunghju di u 2021 mettini in risaltu un visu di u mondu puliticu isulanu sfarenti, di capu à fondu, à quiddu di u 2017, aldilà di i Naziunalisti chì ani strappatu a so anziana unioni.


Deci listi ani annunciatu a so participazioni à l’elezzioni, privisti u 20 è u 27 di ghjunghju. Trà iddi, quasgi a mità sò naziunalisti ! Un fattu chì tistimunighja di a divisioni di u muvimentu, à riguardu à u 2017, ma dinò di l’impurtanza di ’ssu currenti in Corsica.

4 listi naziunalisti annant’à 10 !

A disunioni ughjnca Inchieta monda i militanti, ma difficiuli à creda ch’idda pudaria rimetta in causa a piazza cintrali di i Naziunalisti à l’Assemblea di Corsica, tant’hè maiori a so praputenza. 

A prima lista cumpleta d’un muvimentu naziunalistu ad’ essa stata prisintata, hè quidda di Cori in fronti, purtata da Paul-Félix Benedetti è chjamata « Da per noi » ! Si sò affaccati dinò in publicu ma micca tutti, parechji colistieri di Jean Christophe Angelini, quand’iddu’hà prisintatu u so prugramma è a so lista chi si chjama « Avanzemu ! Sò sempri scunnisciuti inveci par avà i culistieri di i dui Prisidenti di l’Assemblea è l’intitulati di a so lista.

« Un soffiu novu » pà Marcangeli ?

In faccia à i Naziunalisti disuniti, a dritta s’hè à l’incuntrariu riunificata, suttu à bandera di Laurent Marcangeli, chì pugna à allargà si à l’elettori di u centru. Una parti d’iddi s’arritruvaia nanzi in u vechju Radicalisimu corsu, sparitu da u 2017 incù l’implusioni di u « Clan » di manca. U ralligamentu à Marcangeli, missu in anda par esempiu da François Tatti, prisidenti di u Mouvement Corse Démocrate (MCD), pari di cunfirmà l’alarghera d’una influenza di Marcangeli, à un doppiu liveddu : geograficu ma dinò puliticu, annant’à i ruvini di u vechju « Partitu » clanistu di manca.

Una via stritta pà Orsucci ?

Annant’à u tarrenu lacatu da a sparizioni lucali di ciarti forzi pulitichi, Marcangeli hè puri in concurrenza incù u riprisintenti di LREM, Jean-Charles Orsucci. U merri di Bunifaziu, à l’infora di u centru drittu, pari più bè piazzatu pà ricuparà una parti di u centru manca è l’anziani Sucialisti, ma l’affari hè più difficiuli ch’idda pari. I Naziunalisti anch’iddi accoddani oghji parechji fiurisciti di a manca – è di a dritta dinò d’altronda – è ancu … eletti di a lista d’Orsucci, chì hà menu puteri è reti d’influenza

RN è Forza Nova…

A a strema dritta, dui listi si sò affaccati : quidda di François Filoni, chì hà ricivutu l’investitura di u RN, è Forza Nova, cundutta da Jean-Antoine Giacomi, sciutu iddu da u RN chì li paria troppu « parisianistu », cusi dici u giovanu candidatu. Hè u fiddolu di u merri di u Prunu, Charles Giacomi, anzianu candidatu FN à i Tarrituriali di u 2017. Intazza u « carcan mondialiste » indù si sariani insarrati l’eletti naziunalisti corsi… 

I Cumunisti prisenti, micca i Radicali nè i Sucialisti !

Da u cantu di a manca, chì hè monda cambiatu in Corsica ’ss’ultimi anni, solu dui currenti sò prisenti, unu cumunistu (PCF) è l’altru eculugistu (Eculugia Sulidaria). Sò spariti da u campu eletturali i Sucialisti è i Radicali, chì cumpuniani una forza putenti, sin’à l’anni 2010. In i listi di manca in Corsica, in u 2021, nemmancu ùn s’affacca a LFI (La France Insoumise). Era nata una pulemica, in u 2017, trà Jean-Luc Mélenchon è u riprisintenti corsu di u PCF, chì avia annunciatu una lista incù militenti LFI. Quist’annu, a lista diretta da Michel Stefani (PCF) si prisenta sola, chì a Manca Alternativa di Jacques Casamarta hà dicisu ch’idd’ùn participaria micca à l’elezzioni, nè sola, nè incù un antru muvimentu. U Partitu cumunista ùn hà più eletti à l’Assemblea di Corsica dippò l’ultimi elezzioni è pugna oghji à circà un antru fiatu.

Eculugia Sulidaria : di manca è autunumista

Nascitoghja in quant’ad’idda in u campu puliticu corsu, a cualizioni Eculugia Sulidaria adunisci quattru furmazioni : EELV, Génération.S, Nouvelle Donne è Génération Ecologie. Hà pricisatu ch’idda pudaria alliassi à i Naziunalisti à u sicondu giru. S’idda si situighja à manca ’ssa cualizioni, u muvimentu eculugistu hè sturicamenti statu purtatu in Corsica da l’urganisazioni naziunalisti è t’hà sempri monda rilazioni incun’iddu. A portavoci d’Eculugia Sulidaria hà d’altronda mintuatu i so cunvargenzi incù Femu a Corsica è a so adesioni à a rivindicazioni autunumista.

Solu una donna…

L’eculugisti sò i soli chì ani missu in risaltu un a di i so primuri, ancu nanzi a furmalisazioni di a so lista : sarà purtata da una donna. Leslie Pellegri, sicritaria righjunali d’EELV, era prinsintata comu a pussibuli Nu1, ma hè finalmenti Agnès Simonpietri chì hè stata investita. Ci voli à matriculà dinò chì i respunsavuli di i quattru furmazioni chì componani ’ssa Cualizioni eculugista sò tutti donni ! Un prufilu chì scambia da l’altri muvimenti pulitichi isulani, tutti supranati da omini, in ’ss ’elezzioni 21. A sola donna chì era capilista (di dritta) in u 2017, Valérie Bozzi, hè oghji ralliata à Marcangeli.

Un « front républicain » ?

A fighjulà u campu generali di’ssa Campagna, hè a lista di u merri d’Aiacciu chi pari a più capaci à scambià u visu di u mondu puliticu isulanu : pudaria dà à a dritta riunificata un fiatu novu. In quant’ad’impidiscia una nova alzata di u muvimentu naziunalistu, puri divisu, pari difficiuli. U tazzu trà naziunalisti pudaria quantunqua pirmetta à a dritta di fà un gran’ritornu è d’impona u so leadership annant’à un « front républicain » comu hè chjamatu, di modu discutevuli, u campu uppostu à a rivindicazioni naziunalista. A manca hè divintata troppu debuli pà incarnà ‘ssu campu, à a CDC. Solu a lista di Jean-Charles Orsucci, suttu i culori LREM, pò essa una di i so riprisintenti, incù quidda di Marcangeli.

Fattu simbolicu, s’iddu si fighjola i nomi di i listi : sò tutti in lingua corsa, à l’infora di quiddi di Jean-Charles Orsucci, « La Corse terre de progrès », è di François Filoni pà u RN « Les nôtres avant les autres »! Aspittendu, cuntinuighja u … « Mercato » è riservariani surpresi i nomi di i fiurisciti di ciarti muvimenti o famiddi pulitichi, prisenti in i principali listi.

L'Autori

Laisser un commentaire

Corsica.news

GRATUIT
VOIR