REFERENDUM IN KANAKY : DOPU À NOUMEA

Ci hè statu u 3u referendum d’autodeterminazioni u 12 di dicembri. Senza sorpresa, colp’à a chjama à l’astensioni di i separatisti, hà vintu u INNÒ incù 96,49% di i voti,  è una participazioni – 43,87% – monda più bassa cà nanzi (81% in u 2018, 85,69% in u 2020). Mentri chì u guvernu saluta a « vulintà di stà francesi », i naziunalisti iddi dinunziani una scrucunaria urganizata da a Francia. Sicondu l’accordu di Noumea, ani da principià avà discussioni in giru à un statutu novu da dà à u Territoriu d’oltremari.

L’accordi di Noumea

Negoziatu dopu à l’accordi di Matignon di u 1988, l’accordu di Noumea prividia u trasferimentu irreversibili di ciarti puteri da a Francia à a Kanakia in parechji duminii à l’eccezzioni di a Difesa, a Sicurità, a Ghjustizia è a muneta. Firmatu u 5 di maghju di u 1998 in Noumea sottu à l’egida di Lionel Jospin, à l’épica Primu ministru, st’accordu avia a particularità di custringhja u Statu, chì pà ricuperà ogni puteru trasferitu, ci vularia un referendum è una mudificazioni custituziunali. Prividia dinò trè referendum à nantu à l’indipendenza di a Kanakia, in casu d’un votu negativu per i dui primi. Pà ‘ssu terzu referendum, ci hè statu boycott da i separatisti colp’à u ricusu di u Statu d’attimpà a so urganisazioni.

I raghjò di u boycott

L’8 di luddu di u 2021, l’indipendentistu Louis Mapou hè divintatu capu di u guvernu cullegiali di Kanaky, una prima dipò l’accordu di Nouméa. Mossi da una dinamica pusitiva, i separatisti aviani quantunqua dumandatu ch’iddu sighi attimpatu u terzu referendum, pà un periodu di dolu prolongatu pà i famiddi Kanak culpiti da u Covid-19. I « legalisti », da a so parti, ani denunziatu l’usu di a pandemia comu un pretestu per evità a scunfitta, u Covid avendu, d’apressu à iddi, missu in risaltu l’azzioni pusitivi di u guvernu francesi.

À chì ni semi avà  ?

U referendum di u 2021 marca a fini di u periodu definitu da l’Accordu di Noumea. Hà da vena avà un tempu di transizione chì ci voli à definiscia un statutu novu per l’arcipelagu in a Republica Francesi. ‘Ssu testu stessu sarà sottumissu à un referendum in u 2023. 

Ci voli à sapè chì u nosciu partinariu, ALLINDI SVOD, pruponi à nantu à a so piattaforma un documentariu in dui parti fattu da André Waksman, chjamatu Merci la France. Paragunighja u rializatori l’impattu di i pulitichi francesi à nantu à dui tarritorii à identità forti : a Kanakia … è a Corsica ! Era Dumè Gallet u filu di ‘ss’ opara. Mortu in u 2013, l’anzianu membru di Canta u Populu Corsu fù unu di i primi indipendentisti à essa elettu à l’Assemblea di Corsica, in u 1984.

Laisser un commentaire

Corsica.news

GRATUIT
VOIR