U campu simeonistu & u FLNC

U campu naziunalistu corsu hè prisintatu, à l’accorta, comu fattu da dui currenti : unu chì hè statu sulidariu, longu à a so storia, di u Flnc, è chì hè dittu « radicali », è un antru, « muderatu »,  oppostu à a viulenza è à a clandestinità. L’antagunisimu ùn asisti difatti più à riguardu à i mezi d’azzioni, dipò l’addii à l’armi di u Flnc in u 2014, ma hè sempri prisenti indè l’uggettivi pulitichi: l’Indipendenza o l’autudeterminazioni, rivindicata da i Radicali, è l’Autunumia, bramata da l’altri. U muvimentu u più impurtanti oghji di l’ala muderata, Femu a Corsica, hè puri misticciu in quant’à l’identità pulitica di i so militenti : sò parechji l’anziani di u Flnc ad arritruvassi à fiancu à i so « frateddi nimichi » di nanzi.

A ricumpusizioni in anda da u 2014 hè stata un pocu piattata, ‘ss’ultimi anni, da l’identità di i dirighjenti di i dui furmazioni principali, sin’ad’oghji, di a scena naziunalista. Femu a Corsica hè particularmenti emblematica di l’ala muderata chì u so leader hè u fiddolu d’Edmond Simeoni, cofundatori di u muvimentu autunumistu è legalistu. Di pettu à Gilles Simeoni, u capu storicu di Corsica Libera, Jean-Guy Talamoni, hè  in quant’ad’iddu, riprisintativu di u currenti independentistu à riguardu à u so parcorsu sanu sanu. Hè statu da a so ghjuventù militenti indè l’urganisazioni publichi successivi – trà quali parechji disciolti da u Statu – chì, da i Cumitati pà a salvezza di a Nazioni à a Ccn, u Muvimentu corsu pà l’Autodeterminazioni, è a Cuncolta Naziunalista, ani custituitu in u passatu a vitrina ligali di u Flnc dipò a so fundazioni. 
Archive: conférence de presse du FLNC

À l’incuntrariu di u parcorsu di Talamoni, a varcata di militenti da u currenti radicali à u muderatu hè divintata frequenti dipò più di vint’anni. À principiu di l’Anni Uttanta, indù u leadership naziunalistu era tinutu da u Flnc, era a dinamica inversa chì s’era arradicata : parechji militenti autunumisti ligati à u muvimentu d’Edmond Simeoni, comu Marcellu Lorenzoni è Dumenicu Bianchi, aviani ralliatu i ranghi clandestini dopu à a so incarcerazioni pà l’Affari Bastelica-Fesch, comu l’ani pricisatu iddi stessi parechji anni fà. 

Indè l’altru sensu, monda anziani membri di u Flnc sò passati in i ranghi muderati dipò u principiu di l’Anni 2000, dopu à a guerra fratricida trà i fazzioni clandestini tempi à a decennia 90. Cunsacrendu u leadership presu difatti tandu da u currenti muderatu, l’adesioni ad’iddu di l’anziani militenti « radicali » hè crisciuta da u 2014, temp’à l’addii à l’armi di u Flnc. L’abandonu di a lotta armata hà resu tandu menu viva l’uppusizioni trà i dui currenti ditti, in a terminulugia naziunalista di a Generazioni di u Sittanta, « rifurmistu », pà identificà l’ala autunumista, è « rivuluziunariu », pà parlà di l’ala chì rivindicaia u riccorsu à a lotta armata è à a clandestinità, da uttena u drittu à l’autodeterminazioni di u populu corsu, aldilà di un statutu d’autunumia ghjudicatu troppu ristrittivu.

De gauche à droite : Jean-Félix Acquaviva, Gilles Simeoni, Emile Zuccarelli et Emmanuel Macron

In a Campagna di l’ultimi Tarrituriali, i riprisintenti di l’anziana Maiurità à l’Assemblea sò stati interpellati publicamenti, in quantu à u statu ughjincu di u Muvimentu naziunali è i so uggettivi pulitichi, da setti militenti storichi, anziani di u commando d’Aleria o membri fundatori è rispunsevuli di u Flnc di i primi anni. Par altru, un novu muvimentu clandestinu, u Flnc Maghju 21 – ch’ùn hà micca marcatu a so nascita da una azzioni armata – hà datu una analisi monda critica di u bilanciu di a Maiurità uscenti è di l’implusioni di a lista d’unioni naziunalista attribuita à Gilles Simeoni da i so anziani partinarii. Pocu dopu à a nascita di u Flnc Maghju 21, un cumunicatu cumunu à u Flnc-Union des Combattants è u Flnc di u 22 d’Uttrovi – dui strutturi chì si sò affaccati puntualmenti dipò ‘ss’ultimi anni senza puri rilancià a lotta armata – hà dinunziatu l’eletturalisimu chì currumparia, à u so parè, u muvimentu naziunalistu. U 2 di sittembri, i stessi strutturi ani annunziatu a so intenzioni di ripiddà a lotta armata è dinunziatu, di modu più precisu, l’egemunia di Gilles Simeoni è u novu clanismu ch’iddu riprisintaria.

Dipò ‘ssi presi di pusizioni, ciarti partigiani di u leader di Femu a Corsica, infastiditi da l’analisi mediatichi è di i cummenti prisenti in i reti suciali à riguardu à ‘ssi cumunicati vinuti da urizonti chì si rivindichighjini di l’anziana clandestinità, ramentani off chì Gilles Simeoni hà anch’iddu sustegni maiò trà mezu à l’anziani militenti clandestini. S’iddu pò essa malvistu un sustegnu simuli da ciarti di i so partigiani novi è da l’ussirvatori di l’Esagonu, hè difatti in u mondu naziunalistu cunsidaratu da monda ghjenti comu una prova di lighjitimità storica.  

Sustegni emblematichi

In quant’à l’evucazioni di i sustegni d’anziani di u Flnc à Gilles Simeoni, hè una realità. Ciarti ex-clandestini o anziani partigiani di u Flnc chì sò vicini ad’iddu sò pocu è micca cunnisciuti da u publicu, è u rumori ni parla pocu, à l’incuntrariu di dui militenti storichi di u Fronti chì sò prisintati comu ralliati à u currenti di u Prisidenti di l’Assemblea di Corsica : sò Bernard Pantalacci è Pantaléon Alessandri.  Erani stati imprighjunati è cundannati pà avè tumbatu dui parsoni cunsiderati da u FLNC comu l’assassinii di Guy Orsoni, tempa à a famosa Affari di a prighjò d’Aiacciu, in u 1984. Nanzi à l’evenimenti, Pantaléon Alessandri era statu incarciaratu in u 1978 pà a so participazioni à u Flnc. Era statu accusatu trà altru d’avè participatu à un viaghju à u Libanu da ricircà una filiera d’armi è da acquistà una furmazioni militarina in un campu palestinesu. In quant’à Bernard Pantalacci, era statu imprighjunatu una prima volta pà un attentatu in Bastia, in u 1979.

 

In i fatti, Pantaléon Alessandri è Bernard Pantalacci ùn sò micca militenti di Femu a Corsica, nè ligati ad’iddu pà funzioni diversi, d’ordini puliticu, amministrativu o assuciativu. A so adesioni à u currenti simeonistu hè indutta da ciarti à riguardu à quidda di membri i più stritti di i so famiddi, di quali u sustegnu publicu à Femu a Corsica saria a prova implicita di u so rallimentu à iddi, fendu contu à i codici culturali corsi in generali, è in u mondu naziunalistu è i famiddi di i parsoni cuncirnati in particulari.

U ringraziamentu di Gilles Simeoni

A moglia di Bernard Pantalacci hè militenti di Femu a Corsica ed’era dighjà annant’à a lista simeonista à l’Elezzioni Tarrituriali di u 2015. Fattu simbolicu, hà fattu parti di i qualchi membri di u muvimentu simeunistu di quali u sustegnu hè statu precisamenti è numinavamenti ramintatu da Gilles Simeoni in u so primu discorsu à l’Assemblea di Corsica, dopu a so elezzioni di quist’annu. A scelta di ricurdà publicamenti u nomi di Muriel Pantalacci, trà mezu à tanti militenti più cunnisciuti è invistiti anch’iddi monda in a Campagna, ùn hè certu micca anecdotica. Cuncirnindu Pantaléon Alessandri, hè u so fiddolu chì hè statu Sicretariu generali di u Gruppu di Gilles Simeoni à a Cdc. Dipò u 2020, hè Dirittori di Cabinettu di u Prisidenti di a CAB, a Cumunità d’Agglumerazioni di Bastia, chì t’hà una maiurità simeunista. A visibilità data à u fiddolu di Pantaléon Alessandri è a moglia di Bernard Pantalacci hè riprisintativa pà monda naziunalisti di a vulintà di Gilles Simeoni di rivindicà simbolicamenti u sustegnu di nomi storichi di u Fronti à a so parsona è u so muvimentu.

Archive: Bernard Pantalacci, Pantaléon Alessandri et Pierre Albertini (1984)

L’altru casu, un pocu sfarenti, hè quiddu d’una anziana militenti di u currenti radicali ralliata à Gilles Simeoni, Christine Colonna, a suredda d’Yvan Colonna, chì era da a fin’di u Sittanta upposta à u currenti autunumistu incarnatu da Edmond Simeoni. In u 2015, hè stata eletta inveci à l’Assemblea di Corsica in u « contingent » di Gilles Simeoni prisenti in a lista d’Unioni naziunalista. Ùn hè più eletta da u 2017 ma hè divintata in u 2019 a Prisidenti di u Muvimentu Femu a Corsica, quand’idda hè stata urganizata a so prima Assemblea Generali statutaria. U so nomi à idda dinò hè statu precisamenti ramintatu da Gilles Simeoni, in u so primu discorsu à l’Assemblea dopu à i Tarrituriali di quist’annu, comu quiddu di Muriel Pantalacci. L’ ingaghjamentu di Christine Colonna ùn significhighji puri micca chì u so frateddu Yvan saria partigianu anch’iddu di Femu a Corsica. U so parcorsu hè indipendenti di quiddu di a so suredda. Intantu a missa in risaltu di u nomi di Colonna trà mezu à i sustegni i più stritti di Gilles Simeoni hè puri significativa. Christine Colonna hà avutu l’uccasioni d’avvicinassi da iddu à riguardu à l’incarcerazioni di u so frateddu, chì u leader di Femu a Corsica hè statu u so avucatu in u 2009.  

Radicali è muderati à riguardu à l’Affari Erignac 

I parenti i più stritti di i dui altri militenti cundannati à vita pà l’assasiniu di u prifettu Erignac, Pierre Alessandri è Alain Ferrandi, ùn si sò affiddati in quant’ad’iddi nè à Femu a Corsica nè a Corsica Libera. U fiddolu d’Alain Ferrandi, chì hà uccupatu a Prifittura d’Aiacciu di friaghju di u 2021 incù un gruppu di giovani militenti, pà dinunzià a situazioni carcerali di i membri di u Commando Erignac, avia ricusatu incù i so amichi, dopu à a so viulenta spulsioni di u Palazzu Lantivy da i forzi di l’ordini, di participà à un dibattitu, in visiocunfarenza, incù l’eletti di l’Assemblea di Corsica. 

In quantu à i leaders di Corsica Libera è di Femu a Corsica à riguardu à l’Affari Erignac, dipò a so elezzioni à a Prisidenza di l’Assemblea di Corsica in u 2015, a so attitudini hè sempri stata sfarenti. A l’incuntrariu di Jean-Guy Talamoni, Gilles Simeoni hà sempri participatu à i ceremonii urganizati à a mimoria di Claude Erignac, in u locu di u so assassini. In u 2020, pà a prima volta, un prifettu, Franck Robine, hà ancu salutatu a so prisenza à fiancu ad’iddu. A participazioni di u fundatori di Femu a Corsica à ‘ssa ceremonia hà una dimensioni simbolica quant’è pulitica maiò, monda rimarcata à riguardu à l’assenza di u leader di Corsica Libera. U ricusu di Jean-Guy Talamoni, tutti l’anni indù hè statu Prisidenti di l’Assemblea, di participà à a ceremonia, palesa di modu emblematicu a rialità di l’uppusizioni sempri viva trà i currenti storichi di u Naziunalismu in quantu à i rapporti incù u Statu.

Gilles Simeoni serrant la main de Franck Robine, ancien préfet de Corse, lors de la Cérémonie en mémoire de Claude Erignac, en 2020

D’altri anziani membri storichi di u Flnc ani pà contu soiu fattu publicamenti tabula rasa di l’idei di a so ghjuventù è raggiuntu u discorsu di i Muderati. Hè u casu di Léo Battesti, chì era statu u primu militenti di l’urganisazioni clandestina à rivindicà publicamenti a so appartinenza à u flnc, caccendu u so cuprifaccia in una cunfarenza di stampa di u 1978, quand’era ricircatu pà un attentatu in Bastia. A so affiddatera ughjinca à l’ala muderata hè stata cunnisciuta quandi hà annunziatu a so vodda d’essa candidatu di Femu a Corsica à l’elezzioni legislativi di u 2017. L’hè puri tuccatu à ritirassi, pà via di i critichi inghjinnati da a so candidatura, dopu à i longhi anni indù s’era alluntanatu da u militentisimu naziunalistu, ancu muderatu. Indè l’Anni Nuvanta, era statu militenti di u Mpa, fundatu da Alain Orsoni è chì era a vetrina ligali di u Flnc Canal Habituel, autodiscioltu in u 1997. U Mpa hè sparitu iddu in u 1999.

Hè supratuttu in Bastia è in Corsica Suprana, ch’iddi si sò affiddati di di più d’anziani militenti di u Flnc à i ranghi simeonisti. S’iddu hè statu u casu d’uni pochi chì ani appartinutu à u Flnc Canal Historique o à a so muvenza, u ralliamenti u più impurtanti è u più emblematicu hà cuncirnatu sin’ad’avà quiddi chì erani membri di u Flnc Canal Habituel è u Mpa. L’altri sò firmati più vicini à u currenti radicali è a Corsica Libera, sin’ad’oghji, comu, in Corsica Suttana, una parti di i militenti di a prima ora di u Flnc, ch’ùn ani participatu nè à u Flnc Canal Historique nè à u Canal Habituel. Trà iddi, par esempiu, Saveriu Valentini, attori maiò di u Riacquistu, chì era annantu à a lista di Jean-Guy Talamoni. 

Ricumpusizioni di u currenti « radicali »

Un militenti di Corsica Suttana chì era in quant’ad’iddu ligatu à u Flnc Canal Historique, Paul Quastana, anzianu Cunsiglieru tarrituriali Corsica Nazioni è neguziatori di l’Accordi di Matignon incù Jean-Guy Talamoni, hà raggiuntu iddu i ranghi di Core in fronte, à l’ultimi elezzioni. Hè vultatu à l’Assemblea di Corsica suttu i culori di ‘ss’urganisazioni, à i fundatori upposti in i tempi à u Canal Historique. Paul-Félix Benedetti, capilista di Core in fronte, era difatti in u Nuvanta membru di l’ANC, l’Accolta Naziunali Corsa, fundata in u 1989 da Petru Poggioli, unu di i primi respunsevuli di u Flnc, in rumpitura tandu incù ‘ss’urganisazioni, pà via di ciarti sviaturi ch’iddu avia publicamenti dinunziatu è d’una sfarenza d’analisi à riguardu à a quistioni suciali. Militenti di Corsica Libera sin’à dui anni fà, Pierrot Poggioli hà fattu parti di i setti membri storichi di u Muvimentu naziunali chì ani mandatu a lettara critica à i riprisintenti di a Maiurità Tarrituriali mentri a Campagna, ma ch’ùn ani micca datu cunsigni di votu pà una lista in particulari. Altra figura storica di u Flnc di l’urigini, Nanou Battestini hà fattu parti di i signatarii di ‘ssa lettara. A so fiddola, Serena, era inveci divintata militenti di Femu a Corsica, è ancu eletta cunsiglieri municipali in Bastia annant’à a lista simeunista, ma à l’ultimi Tarrituriali, hà raggiuntu i ranghi di Cori in Fronti, ed’hè eletta di ‘ssu muvimentu. Matteu Filidori, chì avia lettu a dichjarazioni di l’urganisazioni clandestina à u primu prucessu cullettivu di u 1979, pari d’essa anch’iddu avà ligatu à l’urganisazioni di Paul Félix Benedetti. Era prisenti à u meeting di Campagna di Core in Fronte, à l’ultimi elezzioni.

Da leghja dinò :

Oghji chè oghji, s’hè aparta franca è chjara una antra pagina di a storia naziunalista. Corsica Libera ùn hà guasgi più visibilità à l’Assemblea di Corsica. T’hà una unica eletta, Josepha Giacometti, chì s’arritrova à fiancu à Cunsiglieri chì erani incun’idda annantu à a lista cundutta da Jean-Christophe Angelini, leader di u Pnc,  ligatu à u currenti muderatu, puliticamenti più vicinu difatti à Gilles Simeoni, aldilà di i litichi parsunali. Sò oghji l’eletti di Core in fronte chì riprisentani indè l’Emiciclu u currenti radicali. Hè un capatoghju a situazioni pà Josepha Giacometti. S’hè vista subitu, da i primi ori di a nova Assemblea. Mentri Angelini è i membri di u so muvimentu ùn ani micca participatu à u votu pà l’elezzioni di Nanette Maupertuis, di Femu a Corsica, à a Presidenza di l’Assemblea, a riprisintenta di Corsica Libera ùn s’hè micca astinutu, mà hà vutatu biancu, pà palisà a so sfarenza. ‘Ssa prima rumpitura, simbolica incù u restu di u « gruppu » Angelini apri l’interrugazioni  à riguardu à a seguita di u so parcorsu à l’Assemblea. Palesa a so sulitudini quant’à l’ambiguità di a so piazza è di quidda di Corsica Libera, chì hà riisciutu à essa prisenta indè l’Emiciclu solu pà via di una allienza incù un muvimentu antinomicu di a so andatura « radicali ».

Gilles simeoni et Pascal Lelarge

Monopolu simeonistu 

U muvimentu di Gilles Simeoni , pà contu soiu, ùn hè mai statu cusi putenti à l’Assemblea di Corsica, à riguardu à u numaru d’eletti è à u monopolu ch’iddu t’hà, pà a prima volta, annantu à i dui Prisidenzi. T’hà à tempu, in faccia ad’iddu, da una parti una dritta riunificata, da l’altra parti una uppusizioni naziunalista chì s’hè ristrutturata ed’hè più dinamica. A fighjulà da vicinu, un solu elettu di  ‘ss’uppusizioni naziunalista, Paul Quastana, t’hà un parcorsu ligatu strittu da parechji decennii à u Flnc, chì s’assumidda à quiddu di Talamoni, ma ùn hà micca u statutu ch’iddu avia u leader di Corsica Libera, chi era Prisidenti di l’Instituzioni. A situazioni palesa bè a fin’d’un’epica. L’attu novu cunsacrighji a sparizioni di l’anzianu currenti radicali in a scena stituziunali è u leadership putentissimu di i « muderati » è più particularmenti di l’ala Simeonista in u campu naziunalistu. Hè quasgi quaranta anni dopu l’intrata splusiva à l’Assemblea di Corsica, in u 1984,  di u primu gruppu naziunalistu chì rivindicaia a so sulidarità incù a lotta armata è chì cuminciaia à piddà a suprana annant’à u currenti muderatu, ghjuntu iddu in u 1982 à l’Assemblea, nascitoghja  tandu.

Vittoria naziunalista inedita

In ‘ssu 2021, tutti i currenti inclusi, a vittoria di i Naziunalisti à i Tarrituriali hè varcata aldilà di quiddi di u 2015 è 2017. Quasgi 93 000 isulani ani vutatu pà iddi ! Hè un successu ch’ùn s’era mai vistu in Corsica pà un partitu puliticu lucali, qualsiasi u so culori. A tempu, a putenza stessa di ‘ssa vittoria pò essa prublematica. S’idd’ùn sbucca annant’à una evoluzioni istituziunali chì saria ghjustificata da l’adesioni di tanti Corsi à i tesi naziunalisti, pudaria inghjinnà una ripresa di l’azzioni armata, evucata da l’ultima presa di pusizioni cumuna di u Flnc UC è quiddu di u 22 d’ottobre. A situazioni divintaria tandu difficiuli pà a Maiurità tarrituriali. A sà bè Gilles Simeoni, chì hà pugnatu un tempu à disattivà i tensioni, nanzi ch’idda sighi bluccata a situazioni da u cartulari di a Corsica Ferries.

Trattaia un articulu publicatu da u Monde u 25 d’Uttobri d’un scontru di sittembri à a piatta, incù Emmanuel Macron, da escia di u bluccami istituziunali. Ci hè statu un’antru scontru, incù u Primu ministru Jean Castex, u 27 d’uttobri. Ci saria statu ancu un terzu appuntamentu, quissu quì incù Jacqueline Gourault, ministra di i cullettività tarrituriali. Saria stata evucata a pussibilità ch’iddu pidessi in carica u Statu a mità di i 90 millioni da pagà a Corsica Ferries.

Fà mova i linii hè una necessità pà u Prisidenti di l’Esecutivu. Ma a so pusizioni di munopolu puliticuunica in a storia di l’Assemblea di Corsica è in a vita pulitica isulana cuntempuranea, ristringhji difatti a so facultà à fassi senta da ciarti uppunenti, à l’incuntrariu di u passatu. S’iddu hè ghjuntu dipò u 2014 à rallià monda militenti di l’anziana muvenza radicali, a nova si ristrutturighja di modu più accanitu contru ad iddu è a forma di puteri ch’iddu riprisenta avà. Mentri riaffacca l’ombra di u Flnc, sò tempi più incerti chì parini di cumenciani par Gilles Simeoni, ancu s’iddu ùn hà mai avutu una putenza simuli in a vita istituziunali.

Gilles Simeoni à l’Assemblée de Corse

L'Autori

Laisser un commentaire

Corsica.news

GRATUIT
VOIR