Covid-19 : una pianta in cori à l’Attualità

Usata dipò tempi è tempi in a medicina tradiziunali, l’artemisia Annua, cunnisciuta dinò suttu u nomi d’assenziu chinesi, hè vultata indè l’attualità. A raghjò di ’ss’ intaressu novu pà ’ssa pianta : i prupietà curativi è preventivi ch’idda avaria contru à a Covid. U sughjettu hà inghjinnatu parechji pulemichi in u mondu sanu, affaccati in Corsica dinò, indù d’altri varietà d’artemisia sò cunnisciuti anch’iddi dipò seculi è seculi pà i sò virtù.

Comu ogni pandemia è parechji malatii gravi, a Covid pruvuchighja una mansa d’articuli è scritti, scentifichi o micca, in giru à i trattamenti è rimedii pussibuli, aldilà di i vaccini. ’Ssa pruduzzioni hà puri oghji una cascia di risunanza pà via d’Internet, di i siti è reti suciali, chì li dani una audienza internaziunali, comu à i debattiti inghjinnati in a cumunità scentifica, u mondu puliticu è u publicu, è à a vendita in linia di prudutti diversi. Hè cusi chì, dipò u 2020, l’Artemisia Annua, una varietà di a pianta chjamata in francesu « l‘armoise annuelle », hè turrata famosa in u mondu sanu è a so vendita suttu à formi sfarenti – decozzioni, tisani, pilluli – hà avutu una crescita trimenda.

 
Covid Organics
in Madagascar

A mediatisazioni a più forti cunsacrata à l’unu di ’ssi prudutti, aldilà di quidda di l’idrochrorochina cuntruvirsata di u Prufissori Raout, hà cuncirnatu, da u branu di u 2020, u Covid Organics, dittu CVO, elaburatu da circadori di Madagascar è prisintatu da u Prisidenti di ’ssu paesi comu un rimediu miraculu », una « suluzioni alternativa pà l’umanità », chì pudaria curà i formi ligeri è muderati di a malatia in setti à deci ghjorni. Hà fattu distribuiscia à a populazioni, è in i scoli di a so isula, buttiglii di ’ssa tisana, cumposta pà 62% di stratti d’artemisia. U CVO hè statu prisintatu dinò più tardi suttu a forma di pilluli privintivi è d’una medicina chjamata CVO+curatif. ’Ssi prudutti, plebiscitati da parechji paesi africani, ùn ani micca impidutu a pandemia di culpiscia  à Madagascar, è u Guvernu di u paesi hà finalmenti suscrittu à l’impiegu di i vaccini, ma di malavoglia, u Prisidenti ricusendu pà contu soiu di fassi vaccinà. Da l’altru cantu, dopu i forti reticenzi di i paesi uccidintali è una campagna macagnosa contru à u CVO, qualificatu da « rimediu diplumaticu è puliticu » à prò di u so prumutori, l’OMS hà ricunnisciutu ch’idd’erani veri i virtù di l’artemisia contru à a Covid, missi in risaltu da i ricerchi di i scentifichi di Madagascar ! Sè a tisana ùn hà micca cunvintu l’Auturità sanitaria, l’hà inveci intarissata monda u CVO+curatif. I testi pà trè trattamenti cumposti d’artemisia Annua sò stati missi in anda in parechji laburatorii aurupei è americani… Una pruduzzioni di a pianta hè avà assicurata da una Sucità americana putenti, chjamata ArtemiLife, chì erani nanzi Madagascar è a China i leaders di ’ssu mercatu.

  
L’artemisia in a lotta contru à a malaria

 L’artemisia Annua hè usata monda in a farmacupea chinesa tradiziunali è sò cunnisciuti dinò i so prupietà in i trattamenti contra a malaria, chì ùn hè ancu sradicata oghji. Aviani avutu una mediatisazioni maiò tempa’lla guerra di u Vietnam, quand’idda hè stata mandata in ’ssu paesi da Mao una medicina fabricata incù ’ssa pianta, dà curà -incù successu- i cumbattenti chì luttaiani contru à l’Americani. Hè vultata l’artemisia indè l’attualità in u 2015, quandi a scentifica chinesa chì avia elaburatu in u 1972 u famosu rimediu hà uttinutu, un mezu seculu dopu, u Premiu Nobel di Medicina pà i so ricerchi, chì ani riprisintatu una alternativa maiò à i medicini uccidintali. 

 
Aspittà a fin’di i sperimentazioni clinichi

In quantu à a Covid-19, l’OMS metti in guardia contru à l’acquistu di prudutti vinduti in linia è chì, par avà, ùn ani fattu l’uggettu di sperimentazioni clinichi. Ùn bastani micca i testi in vitro. A mulecola, cultivata in laboratoriu, ùn hà podassi micca a stessa efficacità, in vivo, indè i parsoni tocchi da u virus, è ci vularia à piddà in contu parechji altri parametri. L’ANSM (Agenza naziunali pà a sicurità di a medicina è i prudutti di saluta) allerta anch’idda, da u 2020, à riguardu à prudutti prisintati comu curativi è vinduti annantu à siti micca auturizati. Poni essa gattivi pà a saluta o sò à spessu falsificati, mal’etichettati o cuntrafatti. Pà l’OMS, hè u casu di 50% di ‘ssi prudutti !  

L’oru verdi di i laboratorii maiò

In tantu, oghji, parechji laboratorii internaziunali, in i Stati Uniti – à l’Università di u Kentucky –, à u Messicu, in Alimagna – l’Istitutu famosu Max Plank –, cuntinuighjini i ricerchi annantu à l’Artemisia, è l’effetti antivirali di l’estratti di l’artemisia Annua è Afra, sicati, parini di più concluenti à riguardu à quiddi di l’artemisina pura.  Ùn sò compii l’analisi è a prudenza a più forti s’imponi sempri.

Annantu à i reti suciali, monda ghjenti, chì si sfidini di l’industria farmaceutica à riguardu à ciarti sviaturi, l’accusani di bluccà l’usu di i « rimedii naturali », pà prumova i molecoli chimichi,  chì custarani più caru, ma da l’altru cantu, ci sò daretu à ciarti siti, uperatori mossi da intaressi finanziarii è in margini à tuttu cuntrollu scentificu chì, ghjuvendu si di a moda di u Biò è di a medicina tradiziunali, pruponini trattament alternativi chì poni essa piriculosi !   

   
Schisà l’automedicamentazioni

Par avà, nisciuna medicina umulugata ùn pirmetti di modu sicuru di guariscia di a Covid o di privena l’infezzioni. Ch’iddi sighini decuzzioni, tisani, pilluli, sò tutti scunsigliati franca è chjara da l’Accademia di Medicina. Ricusà l’autumedicazioni di pettu à un sintomu di a Covid : hè a ricumandazioni maiò di l’Auturità sanitarii.

In quantu à l’Artemisia, aldilà di i ricerchi pà a Covid, cunnosci una celebrità mai vista, pà i so virtù diversi. In Francia, una Casa di l’artemisia hè stata aparta parechji anni nanzi a pandemia, in u 2013, pà fà cunnoscia i so prupietà è aiutà a so cultura in ciarti paesi, senza pesticidi nè fertilizanti. Oghji, 23 paesi ani fundatu 81 Casi dedicati à a pianta, cooperativi o impresi di l’ecunumia suciali è sulidaria.

   
L’Artemisia in Corsica

Tempi à l’Antichità greco’latina, i varietà lucali di l’Artemisia, prisenti dinò in Corsica, avariani ghjuvatu in a medicina tradiziunali pà curà parechji malati, trà quali prublemi ginecologichi è disturbi di a pubertà pà i femini. U nomi corsu di a pianta, ditta « armoise » in francesu, hè simuli à u latinu : si dici artemisia. Faria rifarenza à a dea greca di a natura è di a caccia, Artemisia, turrata Diana indè a mitulugia rumana. Era a prutettrici di i donni incinti è chì apparturiani. U so cultu s’hè arradicatu in Corsica da l’Antichità, soca incù i Focesi, Grechi vinuti d’Asia Minori è scalati in Aleria in u VIu seculu nanzi à a noscia era. A dea di a fertilità avaria datu u so nomi à a « pianta di i mammi », ch’idda prutighjia.

Da ’ssi virtù di l’Artemisia lucali à quiddi chì sò studiati oghji contru à a Covid, u nomi di a pianta mitica chì ramenta a famosa dea di l’Antichità ùn hè intantu mai statu cusì prisenti indè l’Attualità internaziunali !

Laisser un commentaire

Corsica.news

GRATUIT
VOIR