I Servizii spiciali & a Corsica : una girata nova

L’annunzia ufficiali di a criazioni d’un postu à a DGSI cunsacratu à u « siparatismu corsu » hà inghjinnatu in Corsica un ribombu chì inchieta.

A Corsica hà vistu, da a seconda mità di u XXu seculu, un stabilimentu maiò di Servizii spiciali. Si sò manifistati in particulari mentri a guerra d’Algeria, in leia cù l’OTAN, pà urganizà in u 1958 un putsch à prò di i sustenitori culunialisti di l’Algeria francesa (operazioni résurrection).
 

À partasi da l’anni 1970, sò stati riattivati ‘ssi Servizii spiciali in u quadru d’attacchi anti-autonomisti è antinaziunalisti, in leia cù ciarti prifetti, sottu à a ferula di u SAC, u Serviziu d’azzioni civica.  Sò stati fatti da a so ufficina lucali, Francia, è sò sbuccati i so malfatti à nantu à l’affari Bastelica Fesch in u 1980. Dopu à un’inchiesta parlamentaria lanciata da u primu guvernu sucialistu, Francia è u SAC sò stati disciolti in u 1982. 

Testimonianza d’un’arradichera maiò in Corsica di i servizii spiciali ancu sottu à l’epica Mitterrand, hè in l’isula chì sò stati basati i « nageurs de combat » chì ani participatu à l’attaccu contr’à u Rainbow Warrior. ‘Ss’ operazioni contru à u bateddu ambientali di Greenpeace in Australia in u 1985 hà fattu un mortu.
 
L’epica di u prefettu Bonnet, chì hè principiata in u 1998, hà vistu risurghja pratichi barbuzardi in Corsica. Oghji, chì i servizii spiciali anch’iddi sò missi à l’ora di a Cumunicazioni, accenti simuli à a prosa barbuzarda spuntani indè l’annunzia di a criazioni di un postu à a DGSI cunsacratu à a lotta « contraterrurista » in Corsica. ‘Ss’informazioni, per parechji osservatori, svegliani ribombi sinistri.
 

Laisser un commentaire

Corsica.news

GRATUIT
VOIR