Produzzioni corsa: chì avvena dopu a « diff' » ?

0

Dippò l’Uttanta dui, è a nascita di a Televisiò righjunali, s’hè sviluppata a produzzioni isulana. Accantu à ViaStella è RCFM, i dui branchi corsi di l’audiovisiu di Serviziu publicu, sò dinò stati fundati sucetà di pruduzzioni, televisiò è radio privati, chì ani rializati filmi, emissioni diversi è documintarii. Ci intaressemi quì à ciò chì diventa tutta ‘ssa patrimoniu, dopu a so diffusioni.

U Serviziu publicu è i so archivii

Una prublematica maiò, pà a ghjistioni è a diffusioni in Corsica di l’archivii audiovisii publichi, hè ch’iddi ùn sò prupietà di ViaStella è RCFM. Appartinighjani prima à FranceTélévisions è RadioFrance, eppò dopu à l’Ina (Institut national de l’audiovisuel) chì hà avutu in carica, nanzi à u sviluppu di u Numericu, a so cintralizazioni.

Incù l’avvenimenti di u Numericu, hè cambiata a missioni di l’Ina : ci vulia in un primu tempu à numerizà tutti ‘ss’archivii, è in un sicondu tempu, gestiscia a so editorializazioni è a so diffusioni. Hè quì ch’iddu casca l’asinu ! O comu dici u francesu « que l’affaire se corse ». In una seria di filmetti sviluppata da l’Ina, s’impara com’iddi sò ghjestiti ‘ss’archivii corsi : una « delegazioni righjunali », stallata in Marsiglia è cumposta solu da 4 parsoni, t’hà in carica di metta in lumi l’insemi di u patrimoniu audiovisiu di u tarritoriu maiò « GrandSud » … è di a Corsica ! Hè cusì chì s’arritrova scantatu ‘ssu patrimoniu isulanu, in i casci è à nantu à i servori di l’Ina…

Chì ci si pò fà ?

In Corsica, pà quiddi chì volini ricuperà è diffusà ‘ss’archivii, l’affari sò in francesi ! Pà u Serviziu publicu, ci voli à fà una dumanda pà uttena i dritti di diffusioni, chì sarani circuscritti à qualchi mesi. Pà u Privatu, si pò cumprà i dritti, ma costani monda caru. Pà dà un esempiu impurtanti, ALLINDI SVOD, piattaforma financiata da a CDC è lanciata in u 2020, hà pà scopu di cintralizà i cuntinuti audiovisii isulani. Pà uttena i dritti di diffusioni di l’archivii, è ancu pà a produzzioni propia à ViaStella -com’a collezzioni Ghjenti, fatta à l’internu- ci vularia ad invistiscia mezi finanziarii impurtantissimi. Paradussalmenti, Allindi ùn pò micca dà una vita nova in l’aghja numerica à ‘ssi produzzioni …  Hè cunfinata par avà a piattaforma à i rializazioni privati è i coproduzzioni.

Una piattaforma Radiofrance & France Télévisions

Pocu tempi fà, a Ministra di a Cultura Roselyne Bachelot annunciaia a missa in anda d’una piattaforma cumuna chì cintralisaria i cuntinuti audiuvisii di u Serviziu publicu chì saria lanciata in u 2022. In un’intervista di Philippe Martinetti rializata da Laurent Casasoprana et publicata à nantu à Corse-Matin u 23 di nuvembri, l’anzianu Capu di Viastella, ch’idd’hè avà in carica di a reta France 3, spiigaia cusì a so visioni :

« Notre ambition est de mettre en place un grand média du service public de la proximité qui englobe TV, radio et numérique. Ce sera la première offre gratuite numérique de proximité en Europe. […] Un média global de demain et d’information de proximité. »

A M3C : Mediateca culturali di a Corsica

Cintralisighja a M3C cuntinuti audiovisii corsi diversi : 42.843 documenti, 33 collezzioni è 13 mostri. In accunsentu incù l’Ina è l’Università di Corsica, hè statu criatu un archiviu di a storia audiovisia isulana, da u 1945 ad oghji, incù elementi selezziunati à parta si di a basa di datti di l’Ina, da una squadra d’universitarii di u Laboratoriu LISA. PPiccatu chì ciarti evenimenti maiò di a storia cutempuranea corsa sighini sguassati : i primi vittorii naziunalisti, i primi manifestazioni in l’anni 90 contra a mafia, ma dinò ma dinò tant’altri mubilisazioni.

Com’in parechji duminii, mond’affari fermani à arrigulà.

L'Autori

Laisser un commentaire

Corsica.news

GRATUIT
VOIR