Da u cantu di a manca, chì hè monda cambiatu in Corsica ’ss’ultimi anni, solu dui currenti sò prisenti, unu cumunistu (PCF) è l’altru eculugistu (Eculugia Sulidaria). Sò spariti da u campu eletturali i Sucialisti è i Radicali, chì cumpuniani una forza putenti, sin’à l’anni 2010. In i listi di manca in Corsica, in u 2021, nemmancu ùn s’affacca a LFI (La France Insoumise). Era nata una pulemica, in u 2017, trà Jean-Luc Mélenchon è u riprisintenti corsu di u PCF, chì avia annunciatu una lista incù militenti LFI. Quist’annu, a lista diretta da Michel Stefani (PCF) si prisenta sola, chì a Manca Alternativa di Jacques Casamarta hà dicisu ch’idd’ùn participaria micca à l’elezzioni, nè sola, nè incù un antru muvimentu. U Partitu cumunista ùn hà più eletti à l’Assemblea di Corsica dippò l’ultimi elezzioni è pugna oghji à circà un antru fiatu.