Scozia – Dopu à a vittoria indipendentista

L’ottu di maghju, l’Indipendentisti scuzzesi ani vintu l’elezzioni à u Parlamentu lucali. Dopu à ’ssa vittoria, dumandani un referendum annant’à l’autodeterminazioni. Hè ricusatu da u Primu Ministru britannicu.

I risultati lucali di u votu in Scozia, chì t’hà u so Parlamentu à Edimbourg, capilocu di ’ssu tarritoriu, cunstituiscini l’unu di l’evvenimenti più impurtanti di l’ultimi elezzioni britannichi. In quistioni : i cunsequenzi previsibili, à riguardu à l’unità di u Regnu Unitu. Hè scuzzulatu l’UK da u Brexit, ricusatu da dui Nazioni – a Scozia è l’Irlanda di u Nordu – chì cumponini u Regnu Unitu ma dipendini sempri di u puteri duminanti « inglesu » di Londres.

I Cunsirvatori « in a trappula scuzzesa »

A u Parlamentu d’Edimbourg, u votu hà cunfirmatu u rinforzu di a maiurità indipendentista. U Partitu Naziunale scuzzesu, u SNP, hà vintu 64 seghji annant’à i 129 di a stituzioni : l’hè mancatu solu un seghju pà a maiurità assuluta ! E i Verdi, chì ani avutu 8 seghji, sò favurevuli anch’iddi à l’Indipendenza. I Cunsirvatori ghjunghjini in Scozia nanzi à i Travaglisti, ma monda luntanu daretu à l’Indipendentisti, incù 31 diputati solu !

U Primu Ministru britannicu Boris Johnson, chì ùn hè micca vinutu in Scozia tempa’lla Campagna eletturali, ricusa un referendum, dicindu ch’una cunsultazioni simuli si pò fà solu una volta, in una generazioni !

U pesu di u Brexit

C’era statu un referendum dighjà in u 2014, è 55% di i vutanti s’erani upposti à l’Indipendenza. Ma u Brexit, vutatu in u 2016 da i Britannichi è intratu in a leggi di ghjinnaghju di u 2O21, cambia difatti a situazioni, chì 62% di i Scuzzesi ani vutatu contru. Bisognu ci hè dunqui à fà contu à ’ssu cuntestu novu, dicini l’Indipendentisti.

Di pettu à u ricusu di Boris Johnson d’accittà un referendum, Nicola Sturgeon, a capimachja di u Partitu independentistu, dici chì a validazioni di ’ssa pusizioni di u Primu Ministru Cunsirvatori piazzaria Londra « in uppusizioni diretta incù a vulintà di u populu scuzzesu è pruvaria chì u Regnu Unitu ùn hè micca un partinariatu trà iguali ». Pà Boris Johnson, hè innò, puntu è basta !

U ricordu di u referendum catalanu

U raportu di forzi dà a suprana à u Primu ministru : hè sciutu vitturiosu da l’elezzioni in u Regnu Unitu. Ani prugrissatu i Cunsirvatori in ciarti righjoni sittentriunali, disindustrializati, favurevuli à u Brexit, è hà cunquistatu ancu u seghju di diputatu d’Hartlepool, bastioni travaglistu dippò 50 anni. In u paesu di Galles, i Traviglisti ani inveci vintu 30 seghji annant’à 60, è i Cunsirvatori solu 16, ma in u paesu sanu, hè una scunfitta maiò pà i Travaglisti, chì s’intazzzani dipò l’elezzioni.

Pà l’Independentisti scuzzesi, hè inveci una vittoria storica. A i so seguiti, sò attenti l’altri nazioni senza stati d’Auropa. Trà iddi, i Corsi di sicura ma dinò i Catalani, chì aviani urganizatu un referendum annant’à l’Independenza in u 2017, ma ùn hà pussutu essa presu in contu chì hè statu dichjaratu anticunstituziunali da u Guvernu spagnolu. Sò stati distituiti l’Ufficiali independentisti, incarciarati ciarti, è d’altri si ni sò scappati da i so loca è da a Spagna, da sfrancassini d’a prighjò.

I risultati scuzzesi cunstituiscini una tappa nova in a cuntistazioni di u puteri cintrali di i vechji Stati d’Auropa uccidintali. Cunnosci ’ssa lutta un fiatu novu dipò ’ss’ ultimi anni, comu ni tistimunighja, trà parechji vistichi, l’alzata di u votu naziunalistu in Corsica da u 2015.