Lista Orsucci: “Corsica, terra di primura”

“Corsica, terra di primura”/Corse, terre de progrès”: hè u nomi di a lista di Jean-Charles Orsucci. Era stata dipusitata in Priffitura sutt’à u so unicu intitulatu in francesu, è prisintata cusi dinò à a stampa qualchi ghjorni fà. U candidatu, cunsiglieri à l’Assemblea di Corsica è merri di Bunifaziu, hà missu in risaltu i prissioni è trappuli ch’iddu hà scuntratu, da impidiscia lu di prinsintassi. A so lista hè monda sfarenti à quidda ch’iddu avia dirighjitu in u 2017.

Interview di Jean-Charles Orsucci,
rializata da PG. Poggioli

Lire la vidéo

A sfarenza trà a lista ughjinca è quidda di Jean-Charles Orsucci à l’ultimi elezzioni, affacca dighjà in u so nomi stessu. Hè stata arrigistrata in Priffitura è prisintata à a stampa in francesu solu, comu “Corse, terre de progrès”, nanzi di piddà un versu bislingui, parechji ghjorni dopu, incù una traduzzioni imprecisa d’altronda: a “primura” ùn vò micca dì “le progrès”, una parodda specifica, in a terminulugia pulitica. Hè strana d’altronda a sparizioni di a parodda in a traduzzioni. Sighi com’idda sighi, hè supratuttu a “valsa esitazioni” in giru à u so nomi, primu datu in francesu, eppò bislingui, chì custituisci una girata à riguardu à a scelta monolinguistica fatta in u 2017, incù “Andà per dumane“. A sfarenza ùn hè certu micca anecdotica, fendu contu à l’impurtanza di a quistioni culturali è linguistica in Corsica. Pari di rinvià à una vulintà di scantassini à riguardu à un fattu monolinguisticu, chì palisighja a suprana di u discorsu idintitariu annant’à a scena pulitica isulana, dipò ‘ss’ultimi anni.

Difatti, oghji, ancu i forzi pulitichi i più upposti tanti tempi à a rivindicazioni linguistica corsa, da a dritta à a manca cumunista, ani sceltu nomi corsi pà i so listi. U solu ch’ùn l’hà fattu hè François Filoni, chì porta i culori di u RN di Marine le Pen, incù a so lista chjamata Les nôtres avant les autres“…

S’idda hè logica a scelta di François Filoni, à riguardu à u naziunalisimu francesu di a furmazioni di strema dritta, saria statu menu capiscitoghju u ricusu di u Corsu da un omu puliticu comu Orsucci, monda apartu, da parechji anni, à a rivindicazioni linguistica isulana. Cuncirnindu lu, u nomi annunciatu solu in fancesu, à principiu, nanzi di divintà bislingui, rinvia à un pusiziunamentu novu.

A prisenza di a lingua francesa in u nomi bislingui di a lista vò metta in risaltu ch’idda hè sola à riprisintà una vera alternativa à ” l’idintitarisimu ” corsu, turratu duminanti, aldilà di i i culori ideologichi di i forzi pulitichi isulani, à l’infora di a riprisintazioni lucali di u RN.

A girata, à riguardu à u nomi solu corsu di a lista Orsucci di u 2017, chì era Andà per dumane, tistimunighja di u pesu di u discorsu anti identitariu chì hè statu l’adn d’unu di i currenti maiò di a vechja manca clanista isulana, incù Jean-Charles Orsucci hè avà dirittamenti in leia, dopu ch’iddu si ni sighi alluntanatu parechji anni, prisintendusi comu ligatu à una manca mudernà è autunumista: un culori chì s’arritrova sempri d’altronda annant’à i so listi à i Municipali! Cuscenti oghji di a difficultà di cunvincia, à i Tarrituriali, una ala di a manca prugressista è curzista, chì si ricunnosci di di più avà in u muvimentu naziunalistu dittu “muderatu”, u Merri di Bunifaziu pugna difatti ad’arrimbassi di modu più putenti à una parti d’a vechja manca antinaziunalista accanita.

Hè supratuttu prisenti ‘ssu currenti in Corsica Suprana, indè l’ala di u Radicalisimu incarnatu da Emile Zuccarelli. L’anzianu merri di Bastia hà d’altronda purghjatu sustegnu à a lista di Jean-Charles Orsucci. U so fiddolu, Jean Zuccarelli, chì a susteni anch’iddu, hà pricisatu ch’idda porta ‘ssa lista “les espoirs de reconstruction d’une famille politique qui ne se reconnaît ni dans la droite libérale ni dans le nationalisme”.

Jean Zuccarelli, comu u so babbu, hà puri fattu u “serviziu minimum”. Ùn hè micca prisenti annant’à a lista Orsucci ! Trè membri “nurdisti” di u muvimentu radicali, in più di i “sudisti”, ci sò inveci: Hélène Salge, Jean-François Paoli è Juliette Dominici. A l’infora d’iddi, ninsciuna parsunalità storica di u mondu radicali o sucialista di Corsica Suprana ùn hè annant’à ‘ssa lista. L’ omu puliticu u più famosu chì ci affacca, in u nordu di l’isula, hè Séverin Medori, merri di Linguizzetta, monda indiatu contr’à l’impresa mafiosa.

Prova si n’hè dinò di a via stritta d’Orsucci, u so anzianu gruppu à l’Assemblea s’hè sbrimbatu ! Solu ferma in a so lista ughjinca Marie-Hélène Padovani. Dui di i so anziani membri si ni sò andati ind’altri listi, unu à drittu, l’altru incù i Naziunalisti, in l’uccurrenza a lista d’Angelini. Dui altri ùn volini più essa candidati pà via di raghjò parsunali.

I defezzioni tistimunighjini di u spaziu puliticu ristrintu chì ferma à Jean-Charles Orsucci, sfragicatu trà a praputenza di u campu naziunalistu è u fiatu novu chì Laurent Marcangeli riprisenta pà una dritta unificata. U capilista di Corsica, terra di primura/Corse terre de progrès pò inveci cuntà annant’à un sustegnu maiò: quiddu di La République en marche (LREM), u muvimentu fundatu da Emmanuel Macron. Marlène Schiappa avia resu publicu ‘ssu sustegnu quand’idda hè vinuta in Bunifaziu, à principiu d’aprili. Avia prisintatu à Jean-Charles Orsucci com’à u “chef de file de LREM aux élections Territoriales”.

I prissioni ch’iddu dici d’avè affruntatu Orsucci, da impediscia a custituzioni di a so lista, palesani un fattu maiò: u sustegnu di u Guvernu hà resu ancu più difficiuli a so andatura! Hè par quissa soca ch’iddu hà ricusatu l’investitura di La République en Marche. Hà inveci accittatu publicamenti u sustegnu di u Puteri, manifistatu da Marlène Schiappa: l’affari rendi monda cuntistabili a prisintazioni di a so lista, fatta da ciarti parsoni, comu “di manca”.