Lista Eculugia Sulidaria: una voci plurali

2021 hè un annu storicu pà l’Eculugisti corsi : dipò 23 anni, alcuna di i so furmazioni ùn avia prisintatu una lista à l’Elezzioni Tarrituriali. S’arritruvaiani i candidati verdi drintu à i listi naziunalisti, chì ‘ssu muvimentu era à l’urigini di a mossa pà l’Ambienti in isula. Oghji, hè sutt’à so propia bandera ch’idda entra in u campu eletturali una Cualizioni verdi isulana, chì l’Eculugia t’hà u ventu in i veli, annant’à a scena intirnaziunali. Un sviluppu natu da a presa di cuscenza di a minaccia chì i danni ambientali facini corri à l’avvena di a pianeta. In Corsica, una nova pagina s’apri in a storia di u muvimentu eculugistu, ma un’hè micca faciuli à scriva. 

Hè affaccata una malintesa subitu à principiu di a Campagna di i Tarrituriali,  quandu’idd’hè stata prisintata à a stampa una Cualizioni verde, nata da l’adunita di quattru muvimenti Verdi: EELV, Generation.S, Nouvelle Donne et Génération Ecologie. Una di i porta voci missa in risaltu da parechji media, ancu in Cuntinenti, era stata Leslie Pellegri, a sicritaria righjunali d’EELV, chì hè a principali urganisazioni di a Cualizioni è a più vicina à u muvimentu naziunalistu. A fucalisazioni mediatica annant’à a giovana militenti avia fattu creda à monda aghjenti ch’avia da essa a capilista. L’infurmazioni era falsa : hè Agnès Simonpietri, anziana Cunsigliera à l’Assemblea di Corsica, membra tandu di u muvimentu di Gilles Simeoni Femu a Corsica, chì hè a Nu 1 di a lista. Hè stata a Prisidenti di l’Ufficiu di l’Ambienti da u 2015 à u 2017.

Un “partenariat historique” incù i Naziunalisti

Ùn affacca difatti mancu Leslie Pellegri à mezu à i colistieri d’Agnès Simonpietri, à ninsun’postu.  A so assenza hè spiegata da u ricusu d’includi à eletti, ciò chì hè u so casu : hè cunsigliera municipali in Bastia, membra di a Maiurità di Pierre Savelli, riprisintenti di Femu a Corsica, u muvimentu fundatu da Gilles Simeoni. 

Ùn avia d’altronda micca piattatu Leslie Pellegri “i cunvergenzi” di a Cualizioni verdi incù ‘ssa furmazioni naziunalista, “les accords électoraux” fatti nanzi, è “la campagne commune” missa in anda anch’idda pochi tempi fà. Una annuncia fatta à corri corri, chì spiega podassi a decisioni di a Cualizioni eculugista di scantà la di a lista, è di pruibiscia a candidatura d’altri eletti! A so missa da cantu ùn impidisci puri micca à Leslie Pellegri di sustena a lista, comu ni tistimunighjini i so missaghji annant’à i reti suciali.

Agnes Simonpietri, a capilista, ricusa in quant’ad’idda di prununciassi annant’à a scelta ch’idda farà Eculugia Sulidaria à u sicondu giru. Una unica precisioni: i soli candidati ch’ùn chjama micca à vutà sò quiddi di a dritta è di a strema dritta. A cualizioni rivindichigha franca è chjara à so arradichera à manca, è à tempu ricunnosci u “partenariat historique” di i Verdi incù i Naziunalisti. 

Una arradichera à manca

Dici Ecologia Sulidaria ch’idda vò alargà oghji u muvimentu verde à manca, prumova un “veru dibatittu d’idei”, è “girà a spadda à u passatu”. In u 2013, s’era strappata EELV trà militenti “curzisti” storichi è un currenti di manca affaccatu più tardi è chì si mustraia criticu, in un dibattitu internu, à riguardu à un accunsentu à ciarti muzioni prisintati da u muvimentu naziunalistu. 

S’arritrovani oghji in a Cualizioni una adunita più larga è di sensibilità pulichi più misticcia. S’idd’ùn s’hè tanta sparghjata da u cantu naziunalistu, indù i militenti sustenini i diversi furmazioni di ‘ssu muvimentu, Ecologia Solidaria hà inveci accoltu à fiurisciti  di una manca à a malavia.

S’arritrovani dunqui à fiancu à fiancu éculugisti vicini à l’ala ditta “muderata” di u muvimentu, Sucialisti partisgiani di l’autunumia da monda tempi o da pocu, com’Anne Marie Luciani, anziana Cunsiglieri municipali aiaccina tempa’lla mandatura di Simon Renucci, è ci sò dinò candidati vinuti da una manca ripublicana  storicamenti upposta à a rivindicazioni naziunalista.


 ‘Ss’ultimu currenti affacca trà altru, in a lista, incù Isaline Amalric-Choury, à u 63u postu, u più viditoghju incù u primu. Facia parti ‘ssa candidata, in u 2019, di u Cumitatu di Sustegnu à Ian Brossat, candidatu di u PCF à l’Elezzioni Aurupei, indù era prisenti una lista eculugista chì cuntaia François Alfonsi, militenti verdi da sempri è membru di Femu a Corsica

Hè cunnisciuta supratuttu Isaline Amalric-Choury in tantu cà nipota di a Risistenti cumunista famosa Danielle Casanova. A so participazioni à a lista Eculugia Sulidaria hè a so prima rumpitura publica, in Corsica, incù a so famidda pulitica, quidda di u PCF, chì prisenta una lista à ‘ss’elezzioni. A so girata hè monda simbolica di a ricumpusizioni pulitica corsa ughjinca è di quidda di u muvimentu eculugistu.

L”identitarii” è l’altri

Affacca dinò, in a lista verdi, Liza Terrazzoni, sociologa, chì paria poca suscettibili d’accunsentu incù a prussimità rivindicata da Ecologia Sulidaria di u muvimentu naziunalistu. Avia palisatu in parechji scritti è interviews pusizioni monda critichi à riguardu à a rivindicazioni idintitaria corsa chì, à u so parè, custituia una minaccia pà a dimucrazia ed’era pruduttori di sviaturi razzisti. A so prisenza annant’à a lista eculugista prova ch’idda accetta oghji i pruposti pulitichi sciuti da u campu naziunalisti è chì sò ripresi tutti quanti da i Verdi. 

Vinutu da un urizonti monda sfarenti à Lisa Terrazzoni, hè prisenti  à mezu à i candidati eculugisti Ugo Casalonga, ligatu strittu iddu à a scena culturali è pulitica idintitaria comu a so famidda sana, stallata in Pigna. Simbulisighjini ‘ssi dui parsunalità, è tutti quiddi d’Ecologia Sulidaria, i  voci plurali chì s’arritrovani uniti oghji annant’à a difesa di l’Ambienti, da dinuminatori cumunu, è annant’à “idei di manca”. Ferma à veda qual’sarà a lista chì, pà a Cualizioni, riprisintarà u più a Manca, à u Sicondu giru di ‘ss’Elezzioni è chì binificiarà u più di i voti verdi, s’idda ùn ghjunghji micca Eculugia Sulidaria ad’essa prisenta idda. In effetti, s’iddi sò scantati i Cumunisti a sera di u primu giru, ciò chì hè accadutu à l’ultimi elezzioni, ùn ci sarà difatti nisciuna lista ufficialmenti idintificata à manca …

L’assenza di i nomi corsi più famosi di a lotta pà l’Ambienti

Un fattu maiò, ma pocu missu in risaltu, intarrughighji, à riguardu à a cumpusizioni di a lista Eculugia Sulidaria:  s’arritrovani candidati ch’ùn sò mai stati Verdi sin’ad’avà, ma inveci micca i parsunalità i più famosi di a lotta isulana pà l’Ambienti di ‘ss’ultimi decennii !  Nè Michèle Salotti, fundatrici di l’Associu U Levante, nè Vincente Cucchi, chì scumbatti dipò tanti anni incù l’Associu ABCDE in Bunifaziu contr’à i distruzzioni ambientali nati da a speculazioni immubiliaria ! Vincente Cucchi hà pricisatu à Corsica.News ch’idd’ùn hè micca stata sullicitata pà essa prisenta nè in a Cualizioni nè annant’à a lista. Cusì saria pà parechji militenti storichi di a difesa di l’Ambienti. Ùn sò puri eletti in qualunqua muvimentu è currispondi u so prufilu à quiddu chì saria statu ricircatu,  cusì hè ditta,  pà a lista. A vulintà di scantà li hè dunqui una scelta pulitica. A chì uggitivu currispondi? Scantà voci curzisti da sempri ma chì sò monda critichi à riguardu à a gestioni di a Maiurità tarrituriali ? Difficiuli à dì. Hè puri monda strana a scantera di donni militenti da sempri è minacciati pà via di a so lotta pà difendi l’Ambienti.

In l’assenza di ‘ssi parsunalità famosi di a mossa isulana pà l’Ambienti, u nomi u più cunnisciutu di a lista Ecologia Solidaria, in tantu cà militenti verde “storichi”, hè Agnès Simonpietri. Al’incuntrariu di Vincente Cucchi è Michèle Salotti, curzisti ma chì sò firmati à l’infora di i muvimenti naziunalisti è di u mondu stituziunali,  u so parcorsu, sin’à pocu, l’idintifichighja à u muvimentu di Gilles Simeoni, Femu a Corsica, ancu s’idda ùn ci participighja più, è à a maiurità tarrituriali, à qual’hà cullaburatu da eletta è prisidenti di l’Uffiziu di l’Ambienti.

A via difficiuli di l’emancipazioni

U passatu d’Agnès Simonpietri sin’à u 2017, comu l’identità pulitica di parechji membri di a Cualizioni è candidati, è u sustegnu di Gilles Simeoni à a lista eculugista EELV di Yannick Jadot à l’Elezzioni Aurupei di u 2019 indù hè statu elettu François Alfonsi, militenti di Femu a Corsica, palesani a difficultà d’emancipazioni di l’Eculugisti, in a vita stituziunali, à riguardu à l’ala “simeonista” di u muvimentu naziunalistu. U discorsu à prò di Femu a Corsica, tinutu publicamenti da Leslie Pellegri, hà missu in risaltu ‘ssu fattu un pocu di più, ancu s’idda hè stata scantata à spiccera a porta parodda rispunsevuli di ‘ss’errore di cumunicazioni! 

Pà l’Eculugisti corsi, l’unica via da piddà a so autunumia vera à riguardu à i Naziunalisti, saria di fà tombula, à u primu giru, è di scedda di mantenasi à u sicondu giru … Dipindarà di i risultati di u votu, à riguardu à una alzata forti di a dritta par esempiu, è di i scelti fatti da l’uni è da l’altri.

A quistioni di i donni

Aldilà di a so ricirca d’emancipazioni à riguardu à i Naziunalisti, a lista eculugista t’hà una specificità maiò : hè l’unica chì t’hà una donna à u so capu. Ùn hè micca a so unica particularità: Agnès Simonpietri hè a sola capilista à campà in paesu, un spaziu campagnolu monda simbolicu in Corsica. Hè a sola ad essa indiata indè una impresa emblematica di l’ecunumia idintitaria è di u pasturalisimu, cusì arradicatu in a cultura isulana. E l’ultima candidata di a lista, Isaline Amalric-Choury, campa anch’idda in paesu è porta una mimoria maiò : quidda di a Risistenza feminile.

A quistioni di i donni hè innegabilmenti più prisenta in u discorsu è in i cuntinuti numerichi di a lista eculugista cà indè l’altri furmazioni. 


Una girata indè l’icunugrafia pulitica

L’icunugrafia hè più feminizata è più misticcia dinò, in u Situ web di a Cualizioni. Un dissegnu di ‘ssu Situ palesa una affaccata fundiva: trà mezu à una adunita di donni trà quali ci sò parsoni più o menu cunnisciuti, sò prisenti tutti i culori di pelli è dinò d’altri segni di a diversità: un copricapu chì pari di figurà un turbanti indù o u velu di una musulmana, è monda più viditoghju, u visu barbutu di una parsunalità transgennaru. Simbulisighjani a triplice rivindicazioni, feminile, antirazzista è pro lgbt, chì hè purtata da u discorsu eculugistu. Sò dinò quissi i culori prisenti indè l’arcubalenu di i Verdi, u so famosu logo, aldilà di a difesa di l’Ambienti è sò i soli di i candidati 2021 à stampà li in a maghjina. Si vidi puri un segnu stranu, piazzatu à l’insù è a manca d’u dissegnu: hè scrittu “USA”, ed’hè l’unica parodda mintuata, ùn si sà parchì ! Hè poca capiscitoghja ‘ssa missa in risaltu di i Stati Uniti, à a putenza duminanti cuntruvirsata, pà i Verdi di u mondu sanu trà altri. ‘Ssa rifarenza pò inghjenna una malintesa, monda contraprudittiva à riguardu à u missaghju purtatu da a maghjina, chì hè forti. 

‘Ssa maghjina chì affacca in u Situ web di a Cualizioni verdi tistimunighja d’una girata storica indè l’icunografia pulitica è eletturali corsa. Hè stata poca è micca missa in risaltu sin’ad’avà. A so diminsioni simbolica hè puri maiò, quant’à l’identità numerica di u Situ d’Eculugia Sulidaria: hè u primu, dopu à quiddi di l’Associi verdi è di qualchi muvimenti, EELV par esempiu, à piddà un versu cusì allisciatu. Hè a stampa a più viditoghja di a nova pagina scritta in ‘ss’annu 2021 da una parti di u muvimentu eculugistu isulanu, chì sbula oghji, sutt’à i so culori, indè u campu eletturali.  

Laisser un commentaire

Corsica.news

GRATUIT
VOIR