CATALOGNA : un Guvernu tant’aspittatu

Dopu à più di trè mesi di niguziazioni, ani sbuccatu i dui principali partiti indipendentisti di Calalogna à un accordu pà custituisci un guvernu di cualizioni. 

9 ghjorni nanzi ch’iddi sighini statu nicissarii novi elezzioni, di pettu à l’assenza d’un Prisidenti di a Catalogna sceltu da i membri di u parlamentu autonumu, i dui muvimenti indipindintisti maiò, l’ERC (Esquerra Republicana de Catalunya) è JUNTS o JxCat (Junts per Calalunya) ani riisciutu à francassini di i difficultà chi aviani fattu piantà i discussioni dippò l’ultimi elezzioni catalani di u 14 di friaghju .

Era dighjà stata missa in anda una allienza trà i dui muvimenti in u 2015 (Junts Pel Sì) ed’hè à idda ch’idda devi a Catalogna u Referendum pà l’indipendenza di u 2017. U so risultatu era statu à u liveddu di a riprissioni spagnola chi l’avia suvitatu!

L’anni ulteriori erani statu abbughjati da una rumpitura di u dialogu trà i dui currenti  principali di l’independentisimu, pà via di i divergenzi strategichi annant’à a pulitica scelta à riguardu à u guvernu spagnolu. L’ERC avia principiatu niguziazioni incù Madrid, mentri ch’idd’ùn’era d’accunsentu l’altru muvimentu incù a forma presa da ssi discussioni. Da tandu, i polemichi erani firmatu vivi trà i dui urganisazioni, chi aviani tremindù ripunsevuli incarciarati o in esiliu. 
A l’elezzioni di u 14 di friaghju di u 2021, l’ERC,  vincitori da pocu davant’à JUNTS, avia capivultatu u raportu di forzi chi asistia sin’à tandu in u campu independentistu.
L’8 di maghju, l’ERC avia annunciatu ch’idda piantaia i discussioni incù JUNTS, intazzendu u rollu di u Cunsigliu pà a Ripublica, una struttura ligata à Junts chi si prisenta comu un guvernu catalanu parallelu. È stata fundata da Carles Puigdemont, l’anzianu Prisidenti catalanu di u 2017, attori maiò di a dichjarazioni d’indipendenza, esiliatu in Belgica dippò a riprissioni di a secessioni pà u Statu spagnolu.

L’avvicinanza di u 26 di maghju – l’ultimu ghjornu nanzi ch’iddi sighini nicicissarii novi elezzioni pà via di l’assenza d’un Presidenti, ma dinò a prissioni populari pà furmà un guvernu, ani cunvintu i dui muvimenti independentisti d’accunciassi annant’à a scelta d’un Prisidenti è d’adunisciasi in un novu guvernu di cualizioni. Una decisioni cunsulidata à l’uccasioni d’una cunfarenza di stampa u 17 di maghju, indù Pere Aragonès (ERC) è Jordi Sanchez (JUNTS) ani annunciatu u principiu di a nova legislatura u 20 di maghju è a prumissa d’intensificà i sforzi à prò di l’indipendenza di a Catalogna. 
L’attori principali di a manca ripublicana independentista (ERC) in ‘ssu consensus, Pere Aragonès, prisidenti di u guvernu catalanu autonomu, chi era nanzi à ‘ssu postu solu pà interim, s’arritrova avà à u capu di a Generalitat, u guvernu autonumu. I 14 ministerii di ‘ssu guvernu sarani spartuti à igualtà trà i dui furmazioni. » Un gouvernement fort, qui mise sur le dialogue et la négociation pour résoudre le conflit catalan à travers l’autodétermination  » : cusi dicini i partavoci di i dui urganisazioni independentisti.

Sè l’ERC, in pusizioni di forza, palesa a so apartura à u dialogu, parechji di i so intirlocutori di nanzi, comu u terzu partitu independentistu, a CUP ( Candidatura d’Unitat Popular), incù quali avia fattu un pre-accordu di guvernu, s’arritrovani scantati. In quant’à u Guvernu spagnolu di Pedro Sanchez, chi avia principiatu i discussioni incù l’ERC, vidi solu in i pusizioni ughjinchi di u novu guvernu catalanu u risicu di rigiru à una strada senza sboccu. 

Fendu contu à l’uggettivi dichjarati di u guvernu catalanu, comu u drittu à l’autoderminazioni, o a liberazioni di i 12 prighjuneri pulitichi culpiti da cundanni chi vani sin’à 13 anni di prighjò pà u so rollu in u referendum d’independenza di u 2017 dichjaratu illiguali, ferma à veda sè Barcelona pudarà truvà un tarrenu d’intesa incù Madrid, stendu cuerenti à perennizendu u sustegnu populari à l’independenza. 

 

Laisser un commentaire

Corsica.news

GRATUIT
VOIR