L’ovu di l’Ascinzioni
Storia noscia vi pruponarà ogni settimana un articulu à nantu à Corsica.news. U scopu : fà crescia a visibilità di i cuntinuti pedagogichi è corsofoni on-line. Prima prova oghji : l’Ovu di l’Ascinzioni.
À mezu à i tradizioni è i cridenzi corsi, truvemi l’Ovu di l’Ascinzioni.
Hè un ovu guasgi maghjicu, chì pò guariscia, curà è pruteghja la ghjenti.
L’ovu di l’Ascinzioni si pò veda cum’è un ovu maghjicu, hè un pocu u Gandalfu di l’ovi. Allora dighjà, ci voli à tena in capu chì l’ovu t’hà una simbolica forti forti. Hè u simbolu di a nascita è di a rinascita, è sta rinascita hè dinò una manera di curà è di pruteghja.
Si dici ch’iddu saria infracicabuli l’ovu di l’Ascinzioni, ch’ùn pò micca diventà merzu. Tinutu in casa… senza fà frittata, l’ovu pudaria pruteghja a ghjenti da parechji malatii, o sminuiscia a so frequenza o a so putenza. Pà guariscia un malatu, si metti l’ovu accantu à u so lettu.
Pà pruteghja una parsona chì devi ghjunghja in casa, da bia un pastizzu o fassi una sirata foot, ma chì hè in ritardu, l’ovu hè missu à a finestra. Postu chì a finestra faci a lea trà u dentru, a casa, è u fora.
A moglia d’un marinaru, un ghjornu di timpesta o di marighjata, pò metta l’ovu à a finestra pà pruteghja u maritu. O allora pò sciappà l’ovu s’ell’ ùn li piaci più u maritu!
Ultimu affari, l’ovu pruteghji di a saetta, di a fulmina, di u focu, di l’incendiu. In certi rughjoni, l’ovu hè lampatu in u fiumi pà acchittà l’elementi. È quand’elli ghjunghjini i fiammi di u focu, ebbè tandu, l’ovu hè lampatu in u focu !
L'Autori
