U libru di Linda Colley hè a prima publicazioni, fatta à l’infora di l’Auropa, chì t’hà un successu intirnaziunali è chì risituighja a Corsica à una piazza maiò, à traversu à una visioni storica anch’idda inedita, à un doppiu titulu. U primu hè u carattaru universali è rinnuvatu chì l’autori pruponi di a storia, chì includi u cuntributu di i lotti d’emancipazioni antillesi -micca solu contr’à schiavitù, ma dinò contr’à u puteri culuniali di i paesi uccidintali-, un cumbattu fundivu chì cunnisciarà, in u XXu seculu, una nova girata. L’altra diminsioni nova di a littura di a storia fatta da Linda Colley hè a doppia diminsioni missa in risaltu: militarina ma dinò pulitica è ghjuridica. Senza a guerra, a penna ùn avaria bastatu pà fà mova i linii. Senza a penna, a guerra dinò ùn avaria bastatu da scriva in a storia a voci di i ribeddi. « Gun and pen » sò ligati strittu, ramenta u titulu di u libru. Ùn smintica nemmancu a partenza, l’esiliu è a dipurtazioni di i Rivuluziunarii, simbulizati da u « Ship« , prisenti anch’iddu in u titulu.