PAESI BASCU : mubilisazioni pà i prighjuneri d’ETA

2018-04-21, Bilbo. Kalera Kalera ekimenak deuitutako manifestazioa presoen alde "Bada Garaia presoak kalera" lemapean. Irudian manifestazioa

Cinqui anni dopu à l’addii à l’armi di l’ETA, sò sempri incarciarati più di 200 militenti, omini è donni, in Spagna è in Francia. Parechji sò ditinuti dipò trenti anni. Da ’ss’ultimi mesi, i mubilisazioni pà iddi si sò multiplicati, in u Paesu bascu nordu. U so ribombu hè particulari in Corsica, indù a quistioni di i prighjuneri ligati à l’anziana viulenza clandestina naziunalista hè dinò prisenti.


Ùn hè sempri micca arrigulata a quistioni di i prighjuneri di l’ETA, dipò ch’idda hà piantatu i so attentati ’ss’urganisazioni, in u 2011, in u quadru di u Prucessus di paci, chì s’hè compiu incù l’abandonu ufficiali di a lutta armata in u 2017 è a disciolta d’ ETA l’annu dopu.

Prucessus di paci di l’ETA, micca suvitatu d’effetti da u Statu

Aldilà di u fattu chì monda prighjuneri ùn sighini stati libarati, parechji ùn binificighjini mancu di una avvicinanza à i so famiddi, in i prighjò lucalizati in u Paesu bascu o accantu. S’iddu si fighjola l’ultimi ricensi, d’aprili di u 2021, una quarantina di militenti -guasgi u quartu- erani sempri ditinuti luntanu, supratuttu in Spagna meridiunali, in u circondu parigginu o à punenti nordu di l’Esagonu.

Quiddi chì sò stati libarati sò sempri suttumissi à un cuntrollu ghjudiziaru strittu, assignati in risidenza, è ancu interditi di sughjornu pà unipochi, in a so righjoni o i so loca. In l’assenza di una Leggi d’Amnistia, parechji cintinai di militenti sempri ricircati, campani in esiliu, in Auropa, America o Africa.

In i ranghi di i prighjuneri, ci n’hè monda chì sò stati cundannati à peni grevi. Ciarti sò incarciarati dipò trent’anni. 70 pudiani essa libarati in cundiziunali in u 2020 ma ùn s’hè fatta. Hè incù u contagocci ch’iddi s’aprini i porti di i prighjò è guasgi in fin’di pena. Ancu i ditinuti chì t’ani malatii gravi, chì à riguardu à a leggi spagnola quant’à a francesa duvariani essa libarati, stani in prighjò. 17 sò indè ’ssa situazioni, à riguardu à l’ultimi scifri dati da i siti spicializati. Ùn ani micca binificiatu di i libarazioni numarosi, dicisi in Francia è in Spagna in u quadru di i misuri ligati à a Covid. I ristrizzioni cuncirnindu i visiti, pà via di a pandemia, ani rinfurzatu u so isulamenti.

Banderi à favori di l’amnistia in cima di i muntagni baschi !

Di pettu à ciò chì monda Baschi vidini comu una inghjustizia, da i dui canti di i Pirinei, a mubilisazioni hè rifiatatu à riguardu à a quistioni di i prighjuneri è i misuri d’eccezzioni chì toccani à l’anziani ditinuti. In u Paesu bascu Nordu, l’ultima iniziativa hè stata spittaculari. À principiu di maghju, sò stati più di 1000 à fà l’ascinsioni di parechji cimi famosi di ’ssu paesu muntagnolu, da fà svintulà striscioni annant’à u sughjettu.

A libarazioni di Lorentxa Beyrie

A nova marighjata di mubilisazioni, da u 2019 à u 2020, hà soca aiutatu à fà mova i linii. Hè da tandu ch’iddi sò stati fatti a maiò parti di l’avvicinanzi -120 annant’à 152- pà i militenti di u Nordu è di u Sudu. Sò stati cacciati parechji interdizzioni di sughjornu. Sò inveci pochi i libarazioni. L’una di l’ultimi, à a fin’ d’aprili, hè stata quidda di una donna, Lorentxa Beyrie, 46 anni, ma avia fattu a tutalità d’a so pena : 20 anni. Erani stati ricusati tutti i so dumandi di libarazioni cundiziunali.

Macaru i misuri sanitarii chì rendini difficiuli l’aduniti, parechji cintinai di parsoni sò vinuti à accoglia la. A cirimonia urganizata pà u so ritornu, u primu di maghju, era sustinuta da a municipalità di Cambo-les-Bains. Uriginaria di u Paesu bascu Nordu, era incarciarata in Francia, à Roanne, à più di 840 km d’i so loca.

Una di i coditinuti di Lorenxa Beyrie, à Roanne, ci hè sempri incarciarata incù a so zitidduccia. Trè altri donni baschi incù ziteddi chjuchi sò imprighjunati indè l’Esagonu, trà a vintina di ditinuti d’a stessa urigini, ricinsati in u branu di u 2021.

Da Euzkadi à a Corsica

U solu altru tarritoriu dipindenti di Pariggi è cuncirnatu da u stessu sughjettu chì u Paesu bascu, à riguardu à a so storia pulitica è ghjudiziaria, hè a Corsica. A clandistinità ci hè stata più ricenti, menu viulenta è a populazioni issendu menu numarosa, i sciffri ùn sò di u stessu ordini, ma una stessa situazioni ci affacca. Ancu s’idda a lutta armata hè stata compia in u 2014, è chì l’urganisazioni chì a purtaia hà annunciatu ufficialmenti a so disciolta, sò sempri incarciarati militenti cundannati pà attentati. Sò una dicini oghji.

Trà iddi, trè, cundannati in u quadru di l’Affari Erignac, sò in prighjò`da anni è anni : Yvan Colonna dipò 18 anni, Petru Alessandri è Alanu Ferrandi dipò 22 anni. Sò eligibili tremindù à una liberazioni cundiziunali dipò quattru anni, ma i so dumandi ùn sò stati accittati, è a so avvicinanza à tutti hè stata anch’idda ricusata. A situazioni hà inghjinnatu l’uccupazioni di a Prifittura d’Aiacciu, u 22 di friaghju, da una vintina di giovani militenti, trà quali u fiddolu d’Alanu Ferrandi. Appena fatta, l’azzioni hè stata suvitata da una viulenta intirvinzioni di pulizza è cinqui giovani, vinuti senza armi, pà metta banderi à u balcò è essa ricivuti da u Prifettu, sò stati feriti.

S’iddu hè prublematicu dinò l’alluntanamentu di i prighjuneri baschi, è hà inghjinnatu à longu à a storia 400 accidenti di a strada indù sò stati feriti i famiddi chì viniani à visità li, pidda in Corsica una diminsioni specifica, à riguardu à l’insularità è u prezzu di i viaghji in Cuntinenti. Monda famiddi di ditinuti, pà a maiò parti di mezi suciali mudesti, venini menu suventi ch’iddi a vulariani pà via di prublemi finanziarii.

Una incarcerazioni di trent’anni anni pà i più anziani ditinuti baschi, 24 anni pà un Corsu 

S’iddi sò incarciarati dipò trenti anni i più anziani ditinuti baschi, in Corsica, hè Carulu Santoni, libaratu in u 2019, chì hà ’ssu statutu : hè firmatu 24 anni in prighjò è ùn hà avutu nè permissioni, nè rimissa di pena, ma ùn l’avia mancu dumandatu.

U Fijet, i Corsi, i Baschi è l’Islamisti

In Corsica comu in u Paesu Bascu, monda anziani prighjuneri sò suttumissi à un cuntrollu ghjudiziariu strittu, è scritti à u Fijait, chì ricensa i cundannati ghjudicati in u quadru di a legislazioni antitarruristi. Corri annant’à 20 anni u Fijait è l’ubligazioni ligati ad’iddu annant’à 10 anni.

In u 2019, Marc Clément, un Corsu, cundannatu in u 2012 pà un attentatu, fattu dunqui nanzi à l’addii à l’armi di u flnc, hè statu cacciatu da u Fijait, prova si n’hè, dicini ciarti, ch’iddu hè percipitu ancu da ciarti magistrati comu sfarenti u prublema postu da i militenti ligati à l’anziani urganisazioni clandestini naziunalisti, à riguardu à quiddu di l’autori d’attentati djihadisti. E difatti a situazioni hè sfarenti : mentri chì u tarrurisimu islamistu hè in crescita, appartena a viulenza armata à u passatu, pà i Baschi è i Corsi. U fijait ùn saria dunqui più adattatu pà iddi, dicini ciarti.

 I Corsi sò monda attenti à a situazioni di i prighjuneri baschi, è sulidarii. A quistioni di i ditinuti di l’Eta hè evucata indè i siti d’infurmazioni naziunalisti isulani dedicati à i prublemi ghjudiziarii è umanitarii chi cuncirnighjini i militenti cundannati. Sò stati missi in risaltu tempa ’lli mubilisazioni fatti in isula, u 17 d’aprili,  Ghjurnata intirnaziunali di i prighjuneri pulitichi, pà l’urganisazioni chi s’accupani di ’ssa quistioni, Sulidarità è l’Associu Patriotti.

A u Paesu bascu, a prossima mubilisazioni privista à riguardu à i prighjuneri hè una Marchja, u 10 di luddu, trà Bayonne è Saint Jean de Luz, à 31 km. In Corsica, nisciuna iniziativa ùn hè privista par avà.

Laisser un commentaire

Corsica.news

GRATUIT
VOIR