U cunflittu israelo-palestinesi cunnosci un novu incendiu dipò u principiu di maghju. Si multiplichighjani morti è feriti. In più d’una uperazioni di guerra in Gaza, si prufilighja u risicu d’una terza Intifada, à l’ora di u 73u anniversariu di a fundazioni d’Israeli, u 14 di maghju di u 1948. L’evenimenti ani avutu ribombi in Corsica. Sguardu isulanu annant’à una situazioni chì faci vultà in cori à l’Attualità una quistioni chi ciarti pinsaiani suttarata.

U bilanciu hè dighjà grevu è cresci d’ora in ora. 127 morti sò stati ricensati in quattru ghjorni : 9 da u cantu israelianu, trà mezu à quali un ziteddu, 120 da u cantu palestinesi, in Gaza, trà quali 30 ziteddi. Ci hè più d’un millaia di feriti, a mità in Gaza, trà quali 150 ziteddi in ’ssu locu.

Cuntattatu da Corsica.News, l’uni di i riprisententi storichi di a Ghjesgia di Corsica, Preti Pietri, membru di l’associu chjamatu Amitié judéo-chrétienne, hà dittu a so inchietudini è a so emuzioni à riguardu à l’ultimi evenimenti in Israeli-Palestina è à i morti è feriti. Comu u Vaticanu, chì hà publicatu in u so situ a tistimunianza di u preti di Gaza, Gaston Pietri si dici monda primuratu da una pussibuli nova guerra in u Tarritoriu chjusu.

 

U statutu di Gerusalemme-Este

Ùn hè micca inveci in Gaza, ma in Gerusalemme-Este ch’iddi sò principiatu i disturbi, crisciuti da u 3 di maghju. A so urigini hè stata l’interdizzioni d’accessu à ciarti loca di a Città Santa, imposti à i Palestinesi da l’autorità israeliani, è a minaccia di spulsioni d’una famidda palestinesa, da un quartieru di a parti uriintali di Gerusalemme, annessata da Israeli in u 1967. L’Onu ùn hà mai ricunnisciutu pà contu soiu ‘ss’annessioni ch’idda cunsidirighja comu una Uccupazioni illiguali, à riguardu à u Drittu intirnaziunali. U Statu ebreiu rivindichighja in quant’ad’iddu à Gerusalemme com’a so « capitala indivisibili ».

A « Ghjurnata di Gerusalemme », fissata da u 9 à u 10 di maghju, è ghjornu senza travaddu in Israeli, cummimurighja precisamenti a riunificazioni di a città, ripresa in a so parti uriintali dinò à i Palistinesi, tempa’lla Guerra di i Setti ghjorni, in u 1967. ’St’annu, hè d’altronda à ’ssa data anniversaria ch’idda s’hè infiarata a situazioni, dighjà monda tesa in Gerusalemme dipò pareghji ghjorni. Ci era statu cintinai di feriti palestinesi è 9 pulizzieri israeliani, nanzi ch’idda cumincissi l’uffensiva di u Hamas è a risposta israeliana.

U 10 di maghju, ghjornu di l’annessioni di u 1967

Dopu à i disturbi in Gerusalemme è i feriti numarosi annant’à a Splanada di i moschei, l’unu di i lochi santi di l’Islam, u Hamas hà lanciatu da Gaza più di 1500 ruchetti annant’à parechji locaa d’Israeli. Sò stati arristati pà a maiò parti da u Scudu missillisticu israelianu. Hè inveci un focu ardenti chì tocca à Gaza dippò u 10 di maghju. Sò l’attacchi chì si succedini chì ani fattu, aldilà di una dicina di morti in altrò, a tutalità di quiddi chì sò ricinsati oghji.

A zona chjamata « A banda di Gaza », indù campani quasgi dui millioni di parsoni, hè suttumissa à un Blocus dipò u 2007. Hè principiatu quandi u Hamas, idintificatu da Israeli è una parti di a Cumunità intirnaziunali comu una urganisazioni tarrurista, ci hà presu u puteri. Trè guerri ci sò stati dighjà, l’ultima in u 2014. Avia fattu 2 2OO morti palestinesi -trà quali a mità erani civili- è 73, da u cantu israelianu, trà quali 67 suldati. Una quattriesima guerra pari di cumincià. In a notti di u 13 à u 14 di maghju, l’Armata israeliana hà annunciatu, eppò dimintitu, l’intrata di i so truppi in Gaza.

I loca sò guvernati da u Hamas, u frateddu nimicu di u Fatah, muvimentu laicu fundatu frà altri da Arafat è chì hè à a  dirizzioni di l’Auturità Palestinesa(A.P). Hè l’AP chì, dipò l’Accordi d’Oslo, hè à u puteri -puri suttu à u cuntrollu strittu di l’Auturità israeliani- annant’à i tarritorii palestinesi, a Cisjurdania è Gerusalemme-Este. In Gaza, hè stata supranata da u Hamas in u 2007.

U 14 di maghju, una data dui volti simbolica

L’incendiu chì culminighja ’ssu 14 di maghju rinvia à una data monda simbolica. Pà l’Israeliani, hè u ghjornu anniversariu di a fundazioni di u so Statu. Pà i Palestinesi, hè u ghjornu neru, chì rinvia à a « Nakba », una parodda chì vò dì a catastroffa. Marca a fin’di a Palestina intantu cà entità storica, à u nomi è u tarritoriu ricunnisciutu sin’à tandu da l’ultimi puteri chì aviani guvernatu u locu : l’Imperu Uttumanu eppò u regnu brittanicu. Londra ci avia uttinutu un Mandatu datu da a Sdn, l’antenatu di l’Onu, dopu à 14-18, indù l’Imperu Uttumanu, alliatu à l’Alimagna in a guerra, era statu sbrimbatu.

Una tragedia pà i dui campi, ma dui vincitori

Fendu contu à a crunulugia indù si scrivani l’evenimenti d’oghji, à a carica simbolica putenta, dui « vincitori » s’iddi poni essa chjamati cusi, escini da s’ssa nova tragedia. Da u cantu Palestinesu, hè u Hamas, chì s’imponi un pocu di più, pà una parti di l’upinioni, di pettu à Mahmmoud Abbas, u Prisidenti di l’AP, in tantu cà difinsori principali di a Gerusalemme araba è d’una Palestina ancu ricunnisciuta, tant’anni dipò l’Accordi d’Oslo.

In u campu israelianu, hè Netanyahu chì, fendu sminticà i so prucessi ughjinchi pà curruzzioni, si prisenta pà monda Israeliani, in particulari quiddi chì sò u più upposti à un Statu palistinesu, comu u difinsori di a Gerusalemme ebreia è di un « Statu  ghjudeu » difinitu cusì oghji. Hè plibiscitatu u so ricusu di tutti i rimissi in causa di a praputenza israeliana è di a so vulintà d’arradiccassi in Gerusalemme-Este è in Cisjurdania, ch’iddu  vò chjamà solu da u nomi  storicu di « Judea Samaria ».  L’impienti israeliani in corsu in i Tarritorii Palestinesi rendini dighjà impussibuli difatti a custruzzioni di un Statu di Palestina privistu  da l’Accordi d’oslo, à a fin’di u Prucessus di paci, piantatu da parechji anni.

U falimentu di a Cumunità internaziunali

Di pettu à l’uparazioni militari, ma dinò à i disturbi civili chì affaccani in parechji loca, da Israeli à i tarritorii di Cisgiordania è da Gerusalemme-Este à Gaza, l’Onu, l’UE è i Stati Uniti ani fattu pocu affari, parechji ghjorni.

Marcuri u 12 di maghju, u Cunsigliu di Sicurità di l’Onu ùn hà mancu riisciutu à fà una risuluzioni cumuna, ghjudicata da i Stati Uniti comu « contra-pruduttiva »…  Quattru membri di u Cunsigliu, a Norvegia, l’Estonia, a Finlanda è a Francia, ani publicatu un cumunicatu à i so nomi. U scrittu diplurighja i morti di i dui campi ma chjama Israel à « piantà l’attività di culunisazioni, i dimulizioni è i spulsioni in Gerusalemme-Este », ramintendu  difatti l’urigini di l’incendiu.

In quant’à a Russia, hà chjamatu à una riunioni d’urgenza di u Quartet annant’à u Mezu Urienti, criatu in u 2002 è cumpostu da Moscou, l’UE, l’Onu è i Stati Uniti.

Biden, dopu à Trump…

L’una di i voci più aspittati, annant’à a scena intirnaziunali, era quidda di u novu Prisidenti di i Stati Uniti. Ognunu si dumandaia s’idd’avia da essa in rumpitura incù quidda di u so pridicissori, Donald Trump, ligatu à a dritta israeliana dura, incarnata da Netanyahou. Joe biden hà musciatu nanzi à tuttu … una prudenta riserva.

U succissori di Trump si n’hè statu zittu è mutu sin’à u 12 di maghju, quandi hà avutu una discussioni telefonica incù Netanyahu, dumandendu una appacera ma evuchendu in priurità « u drittu d’Israeli à difendasi ».Fattu simbolicu o micca, ùn hè u Prisidenti di i Stati Uniti ma u Sicritariu di Statu, Antony Blinken, chì hè statu incaricatu di cuntattà u Prisidenti di l’Autorità Palestinesi.

Dopu à ’ssi cuntatti, Washington hà annunciatu ch’iddu mandaia un emissariu in Israeli è in i Tarritorii Palestinesi. Sin’à tandu, avia numinatu emissarii in diversi « punti caldi » di u mondu, ma micca in u Mezu Urienti , chì Biden ùn avia micca definitu comu una di i so priurità. A quistioni splusiva di u cunflittu israelo- palestinesu u richjappa oghji…  

Parigi, dopu signatu, incù trè di i so partinarii di u Cunsigliu di sicurità di l’Onu, un cumunicatu chjamendu à l’appacera di i dui campi ma indù affacaia una critica contr’à Israeli, hà cundannatu « fermement » i tiri di u Hamas, chjamendu à a « désescalade » è à un rilanciu di u prucessus di paci. U guvernu francesu hà par altru interdittu i manifestazioni pro-palestinesi privisti in Pariggi.

Ribombi corsi

In Corsica, l’incendiu ughjincu in Israeli-Palestina inghjenna riazzioni cuntrastrati. Annant’à i reti suciali, hè un sustegnu à u Statu ebreiu chì pari d’avè a suprana.  In u tarrenu inveci, l’unica mubilisazioni affaccata par avà hè stata, u 12 di maghju, in Aiacciu, una adunita à a chjama di parechji Associi, chì ani dinunciatu i vittimi civili è « a pulitica d’apartheid fatta da u Statu d’Israeli », à l’incontru di i Palestinesi sempri senza Statu.

A riguardu à l’ultimi evemenimenti, ùn s’hè ancu fatta senta, par avà, publicamenti, a voci di Corsica Terra Eretz, favurevuli in quant’ad’idda, à Israeli. Duvaria affaccà da quì à pocu, pà via numerica almenu, ùn saristi cà pà ramintà u 73u anniversariu di a fundazioni di u Statu ebreiu, indù l’isula hà avutu un rollu impurtanti. In u Dopu guerra, marcatu da a Shoah, u Guvernu di a IVa Ripublica monda favurevuli à u Siunisimu, avia accittatu, à a dumanda di u fundatori d’Israeli, Ben Gurion, di fà di a Corsica una scalata aeriana pà i trasporti d’armi è d’aviò in pezzi staccati, à distinazioni d’Israeli chì scrivia tandu i primi mumenti di a so storia in tantu cà Statu.

Facia parti, Emond Simeoni, di l’Associu Terra Eretz ma era puri favurevuli à a fundazioni d’un Statu palestinesu è dinunciava u Blocus di Gaza. In u 2017, l’imbasciatori di Palestina in Francia hè statu ricivutu ufficialmenti à l’Assemblea di Corsica, in mani à i Naziunalisti, trà quali u fiddolu d’Emond Simeoni.

 

  • In a scena culturali corsa, parechji criazioni, scritti è musicali, parlani di u cunflittu israelo-palestinesu.

 

A l’ora di u 73u anniversariu di a fundazioni d’Israeli, a perspettiva di una nova guerra in Gaza, ma dinò d’una terza Intifada si prufilighjini, incù i seguiti dramatichi ch’iddi pudariani d’avè, aldilà di u Mezu Urienti, in a scena intirnaziunali.

L'Autori

Laisser un commentaire

Corsica.news

GRATUIT
VOIR