AFFARI HALIMI: UNA NOVA LEGGI IN ANDA

L’affari di Sarah Halimi, una donna ebreia di 69 anni tumbata d’aprili di u 2017 in Pariggi da u so vicinu islamistu, hà avutu seguiti novi, dippò i manifestazioni di ghjinnaghju è aprili, ricinsati in Corsica dinò. Un prughjettu di riforma di a Leggi annant’à l’irrispunsabilità penala hè statu missu in anda. U 3 di maghju, hè statu annunziatu per altru u depositu d’una pienta pà apologia di u crimini, à l’incontru di l’autori di un missaghju affaccatu annant’à Facebook pà sustena à l’assassinu.

Hè da u Bureau National de Vigilance contre l’Antisémitisme (BNVA) ch’idda hè vinuta a pienta contr’à un Cumitatu di sustegnu à Kobili Troré, « un assassinu prinsintatu comu un persecutatu », dici l’avucatu Franck Serfati, indignatu da u missaghju publicatu u 26 d’aprili annant’à Facebook. Ancu nanzi à u dipositu ufficiali di a pienta, ùn era difatti più viditoghju in i reti suciali. U gruppu chì vulia difenda à Kobili Traoré avia avutu solu u tempu d’aduniscia à 34 parsoni.

Sò inveci pareghji millai, quiddi chì ani prutistatu contr’à a dicisioni di ghjustizia cuncirnindu l’irrispunsabilità penali di l’assassinu di Sarah Halimi, cunfirmata da a Corti di Cassazioni u 14 d’aprili, dopu à a sintenza di a Corti d’Appellu, u 19 di dicembri di u 2019. I dui volti, ’ssa decisioni hà inghjinnatu un marosulu d’indignazioni. Sò stati urganizati aduniti di prutistazioni, in parechji città di l’Esagonu è in Corsica, in Aiacciu è Bastia. U 25 d’aprili, à a manifestazioni di Pariggi, erani 25 000 à essa prisenti. Dicini parechji tistimonii ch’idda hà riprisintatu una girata in a storia di a cumunità ebreia francesa. Monda di i so membri sò varcati da l’addisperu indù erani dippò parechji anni, di pettu à a cuddata di l’antisemitisimu, à una zerga nera. Dinunziani u « scandalu ghjudiziariu » chì i culpisci.

Oghji, piddani una dimensioni nova i seguiti di l’Affari Halimi. Sbuccani annant’à u prughjettu di riforma di a Leggi. Parechji voci rimettini in causa a nuzioni d’irrispunsabilità penali chì hè stata ricunnisciuta à l’assassinu. S’idda ùn hè micca cuntistata l’irrisponsabilità in casu di tuntia, ùn duvaria micca, dicini monda aghjenti, essa ricevibili l’alterazioni di u ghjudiziu, quand’idda veni, micca da prublemi psichiatrichi preesistenti, ma da un cunsumu vuluntariu di produtti tossichi . Cusì saria pà l’assassinu di Sarah. In u so passatu, t’hà avutu prublemi ghjudiziarii, ma ùn affacariani micca vistichi di una patulugia psichiatrica. Saria un cunsumu maiò di cannabis chì l’avaria fattu sorta di capu è cunduttu à un passaghju à l’attu. Hè statu puri ricunnisciutu bè u so prufilu antisemitu. Andaia in una muschea salafista è avia trattatu a so vicina di « sale juive » nanzi à u ghjornu di u crimini, cummissu briunendu Allah Hakbar è trattendu a so vittima  di « sheitan » (dimoniu) pà via di a so rilighjoni…

In più, dici un espertu ch’iddu era certu « alteratu » u ghjudiziu di l’assassinu, ma micca « abulitu ». Faci una sfarenza maiò à riguardu à a rispunsabilità penali. L’esperti ùn sò intantu micca d’accunsentu trà iddi, annant’à i quistioni cumplessi posti, in u campu di a Leggi, pà l’evaluazioni di u dicernamenti umanu, à riguardu à a natura è l’intensità di i disturbi chì u poni tuccà, i so causi è i so effetti, previsibili o micca. Ci sò parechji liveddi, da a rispunsabilità ricunnisciuta à una irrispunsabilità tutali. Si palisaria un biotu ghjuridicu annant’à ’ssa quistioni, cuncirnindu a riposta di a Leggi à fà, in funzioni di dui fatti : u statu di u dicernamenti di l’accusatu, più o menu alteratu o cumpletamenti abulitu à u mumentu di u passaghju à l’attu, è i causi stessi di i disturbi cunstatati.

U prucuratori à a Corti di Cassazioni, François Molins, dici ch’idda ùn hè « podassi » micca adattata a leggi, ma ch’iddu ci voli à essa attenti à a missa in anda d’una riforma penali dicisa à spiccera è suttu u colpu di l’emuzioni. Pudaria sbuccà sidinnò annant’à una penalisazioni di a malatia mentali, ricunnisciuta dippò u Codice Penali di u 1870 comu una causa maiori d’annulazioni di l’infrazzioni.  

In ciò chì cuncirnighja a sintenza d’irrispunsabilità penali di l’assassinu di Sarah Halimi, ciarti s’intarrughighjini annantu à u fattu  ch’un omu briacu è drugatu chì avia lampatu un ghjacaru da u balcò hè statu cundannatu, à principiu di u 2020,  à un annu di prighjò.  Lampà à una parsona di u balcò, dopu l’avè minata à morti, comu l’hà fattu l’assassinu drugatu di Sarah Halimi, saria menu passibili di sanzioni penali ? E parchì u statu di briachina o u cunsumu di droghi sò ghjudicati comu circunstanzi aggravanti in casu d’accidenti di a strada, allora chì hè l’usu di prudutti tossichi chì inghjenna una irrispunsabilità penali pà l’assassinu di Sarah Halimi ?

Da u 23 di ghjinnaghju di u 2020, davant’à a Cumunità francesa chì campa in Israeli, Emmanuel Macron avia pricisatu chì, qualsiasi a decisioni presa da i ghjudici, u bisognu di un processu si facia senta. Avia dittu puri chi’idd’ùn pudia, u Prisidenti di a Ripublica, cummentà una decisioni di ghjustizia ni rimettala in causa. U so discorsu avia quantunqua fattu u tazzu in i ranghji ghjudiziarii francesi. Magistrati è avucati aviani dinunziatu a pressioni ch’iddi pudiani riprisintà i so paroddi annant’à a prucidura tandu in corsu d’instruzzioni.

Da leghja dinò :

In Francia, dippò parechji mesi, si sò alzati monda voci, in u filu di u discorsu di Macron, pà dumandà, in l’assenza ancu di una cundanna, un prucessu chi pudaria metta in risaltu, publicamenti, a qualificazioni di « crimini antisemitu » difatti ricunnisciuta da a Ghjustizia. L’hà pricisatu u Prucuratori François Molins in una interview à u ghjurnali Le Monde, u 26 d’aprili : hè un « umicidiu aggravatu da u so carattaru antisemitu » chì hè statu ritinutu à l’incontru di Kobili Traoré. U magistratu hà presu à tempu a difesa di u parè datu da i so pari, u 14 d’aprili, à riguardu à l’irrispunsabilità penali di l’assassinu, chì impidisci ch’iddu sighi prisintatu davant’à un tribunali è incarciaratu : hè l’internamenti psichiatricu chì hè privistu in u so casu, da l’articulu 122-1 di u Codici Penali .

A quistioni hè spinosa è pidda una diminsioni particulari oghji. A nuzioni d’irrispunsabilità penali, com’idda hè stata ricunnisciuta indè l’affari Halimi, pò difatti essa prublematica à riguardu à l’autori d’atti terruristi chì sariani drugati : pudariani evucà i so avucati, pà francà li da un prucessu, una perdita di u so ghjudiziu, cunsecutiva à l’usu di droghi … In quant’à i viulenzi ligati à l’antisemitisimu, chì ani tantu marcatu a storia è cunnoscini oghji una nova alzata, pudariani essa « dipinalizati », suttu u pritestu ch’iddi sariani drugati o briachi o tonti i so autori, micca mossi da un discorsu ideologicu à a diminsioni puri attistata in parechji urizonti pulitichi !

U 28 d’aprili, u ministru di a Ghjustizia hà annunziatu un prughjettu di leggi annant’à l’irrispunsabilità penali. Sarà prisintatu à a fin’di maghju in Cunsigliu di Ministri è un votu à u Parlamentu sarà fattu dopu, nanzi à sittembri. Dumandani parechji voci ch’idda piddessi a Leggi u nomi di Sarah Halimi.

A Cumunità ebreia, chì riprisenta solu 1% di a populazioni francesa, saria cuncirnata da 41% di i viulenzi fisichi razzisti ricinsati in u paesu, s’idda si faci contu à l’ultimi sciffri dispunivuli annant’à a quistioni. Hè l’unica Cumunità chì t’hà avutu, in a Francia ughjinca, zitidducci tumbati, individualmenti, aldilà di l’attentati cullittivi, pà via di a so identità… Era in u 2012. 

In Corsica, ùn hè affaccata par avà a viulenza antisemita, ma l’Ebrei isulani -chì sò qualchi dicini oghji- temini pà i soi chì campani indè l’Esagonu.

A piccula cumunità israelita corsa hè stata criata in u 1915, dopu à l’affaccata di più di 750 rifugiati vinuti da a Siria è a Palestina, à l’epica sottu duminazioni ottomana, tempa’lla Prima Guerra.

Laisser un commentaire

Corsica.news

GRATUIT
VOIR