Setti anni dopu à l’addii à l’armi di u FLNC fundatu in u 1976, un novu gruppu armatu, chì hà presu u nomi di FLNC Maghju 21, s’hè affaccatu annant’à a scena pulitica isulana, via une cunfarenza di stampa clandestina chì adunia à ottu militenti, cuprifacciati è armati à fucili mitragliori è pistoli. 

Hè successu l’affari u 5 di maghju, una data monda simbolica: hè quidda di a criazioni di u primu Flnc. Hè stata resa publica a cunfarenza di stampa ughjinca da France3 Corse Via Stella, l’unicu media chì ci assistia, è hà publicatu annant’à u so situ u longu cumunicatu datu da u novu gruppu clandestinu.

In a cunfarenza di stampa è in u so scrittu, u FLNC Maghju 21 dinunzia u fattu chì u Statu, puri abandunata a lotta armata da i Naziunalisti, ùn hà avutu nisciun’gestu significativu d’una vulintà di suluzioni pulitica, Ùn hà micca « envisagé un transfert de souveraineté comme en bénéficient toutes les îles de la Méditerranée depuis des décennies ». U novu gruppu armatu, chì si prisenta comu cumpostu da patriotti vinuti da tutti i strutturi clandestini oghji spinti, ùn si cuntintinghja micca d’una dinunzia di u Statu.

 

A critica franca è chjara di l’eletti naziunalisti à a CdC

Faci falà dinò u FLNC Maghju 21 annant’à l’eletti di Pè a Corsica, chì sò à u puteri dippò u 2015 è a vittoria di i Naziunalisti à i Tarrituriali, è chì ùn avariani sappiutu « se hisser à la hauteur des enjeux ». Pà u gruppu armatu, sariani in una « gestion d’une Collectivité, pas dans la construction d’une Nation ». L’hè rimpruvaratu di mustrà più energia « dans la campagne permanente et l’électoralisme » cà in i so azzioni cutidiani è una vulintà d’impona si pà a credibilità di i so pruposti. Sariani stati non solu incapaci à « gérer les affaires courantes » è truvà i risposti bramati à riguardu à i qualchi cumpetenzi chì li sò stati divuluti, ma supratuttu, ùn avariani micca riisciutu à crià un raportu di forza puliticu incù u Statu. Si sariani insarrati in una « gestion au jour le jour ».

U gruppu clandestinu chjama à un suprassaltu indispensevuli, chì pà iddu, hè a Corsica in un periculu maiò, lacata in mani à « l’appétits financiers de quelques-uns et de groupes qui s’accaparent les secteurs stratégiques avec l’aval de l’Etat et dans l’indifférence des élus. » In a mira di u Flnc, i monopoli in i transporti, l’ipermercati, i carburanti: sò duminii indù ciarti voci di a sucità civili mettini in risaltu l’impresa mafiosa.

L’impresa mafiosa

Hè dinunziata ‘ss’impresa da u gruppu clandestinu chì dici ch’idda si rinforza pà via di a speculazioni immubiliari è u trafficu di droga. ‘Ssa sviatura mafiosa si manifistaria, dici u Flnc Maghju 21, da l’assassinii ughjinchi, ch’ùn cuncirnighjani più solu « les règlements de comptes mais touchent des travailleurs, des honnêtes citoyens et même, ces derniers mois, des patriotes sincères ». Pà l’usservatori, facini rifarenza ‘ssi paroddi à Massimu Susini, tumbatu di sittembri di u 2019, è Stefanu Leca, tumbatu d’uttrovi di u 2020. Pà u novu Flnc, a speculazioni immubiliari ùn hè mai stata cusi putenti in Corsica. « La dépossession est généralisée » cusì dici, inchietendu si par altru di a culunisazioni di populamenti chì « submerge notre petite société qui n’a pas les moyens politiques d’intégrer les flux entrants de populations extérieures à la Corse ». Metti in risaltu u gruppu clandestinu a « décorsisation des emplois qui est toujours à l’œuvre dans les postes d’encadrement dans diverses administrations ».

A chjama à vutà naziunalistu

Affacca ‘ssa cumunicazioni à qualchì sittimana di l’elezzioni Tarrituriali, è l’autori, puri ch’iddi intazzani a gestioni naziunalista, chjamani quantunqua à vutà pà i listi di ‘ss’urizonti puliticu ma dumandendu à quisti di pusiziunassi annant’à basi chjari: « l’élaboration d’un vrai projet de société en vue de l’émancipation nationale du peuple corse ». Un scopu chì và bè aldilà di una « piètre adaptation, à travers l’article 72-5 sans pouvoirs politiques réels, sous le contrôle du parlement français et de l’inflexible constitution française ». Passa pà a liberazioni di tutti i prighjuneri pulitichi corsi, ‘ssa strada nova, ricircata da u Flnc Maghju 21, di una ricunniscenza di i dritti storichi di u populu corsu.

Quant’una bomba

Par avà, u novu gruppu armatu ùn hà fattu nisciun’ attentatu. A rifarenza à un « redéploiement tactique, dans l’attente d’un véritable processus de règlement de la question nationale corse », lascia affaccà puri l’eventualità d’una ripresa di l’azzioni armata. Cusì era stata dinò, u 24 d’uttrovi di u 2020, quandi un commando chì si prisintaia anch’iddu comu u Flnc, avia resu umaggiu à Stefanu Leca, cundannatu in u 2007 pà attentati, è tumbatu senza ch’iddi sighini stati cunnisciuti l’autori di u so assassiniu. A prisenza di u gruppu armatu à l’uccasioni di u so intarru era stata l’ultima affaccata di clandestini è di u siglu Flnc, nanzi à quidda d’oghji, monda più furmalizata, precisamenti numinata, è arrimbata à un discorsu chì rinvia à una tradizioni storica di a lotta armata corsa.

A prucuratrici d’Aiacciu hà dittu à l’AFP ch’idda avia ad’essa aparta una inchiesta è ch’idd’era stata avisata a Procura Naziunali Antitarrurista. À un mumentu cusì vicinu di l’elezzioni tarrituriali, a resurgenza di un gruppu clandestinu armatu, ma dinò u tenori d’u so discorsu à riguardu à l’eletti naziunalisti, ani schiattatu com’una bomba, in ‘ssu maghju di u 2021, ghjustu 45 anni dopu à a fundazioni di u primu Flnc.

L'Autori

4 thoughts on “FLNC MAGHJU 21

  1. Resu-contu monda intelligenti è chjaru. Propriu bè. Felucitazioni. D’accunsentu incu voscu.
    Amicizia.
    Jacky Rocca-Serra, anzianu principal di u culleghju di Livia- Alta Rocca, Anc’assà, avà, à à ritirata, in Aghjacciu è Livia.?

  2. O Petru Poggioli, sè tu, amicu, chi hai creatu stu  » Corsica News  » ?
    Felicitazioni. Scusami, chi sogu vechju avali, è, dunqua, perdu, ùn pocu, a memoria, ancu se mi bagnu in mari tuttu l’inguernu ! Amicizia ! À prestu, spergu !
    ? ?

Laisser un commentaire

Corsica.news

GRATUIT
VOIR