Nabuliò : Filmi made in Corsica

U bicintinariu di a morti di Nabuliò hè l’uccasioni, pà Corsica News, di vultà annant”à un fattu pocu cunnisciutu : a pruduzzioni corsa di ducumintarii è filmi cunsacrati à u ziteddu d’Aiacciu turratu u maestru di l’Auropa.

Piattata daretu à i filmi prudutti in Francia è in altrò incù mezi finanziarii di quiddi putenti, a criazioni lucali fatta da rialisatori isulani t’hà puri un intaressu maiò à doppiu titulu: pà a cunniscenza di ciarti punti di storia,è pà a u riflettu ch’idda rinvia di a maghjina di Bonaparte sculpita da l’isulani.

Hè Marie-Pierre Valli, rialisatrici ma dinò circadori chì, à u principiu di l’anni 2000, avia aparta a strada di ‘ssa pruduzzioni lucali, incù l’unicu ducumintariu in lingua corsa cunsacratu à Bonaparte. Opara fatta in u quadru di l’emissioni Ghjenti di ViaStella, hà purtatu un sguardu novu annantu à i rilazioni di u futuru Imperatori incù Paoli, tempa’lla sò ghjuventù. Hè statu evucatu dinò ‘ssu tema, più tardi, ma in un filmu di fizzioni, rializatu in u 2015 da Rinatu Frassati, Les exilés.

In u ducumintariu intitulatu Rue Bonaparte, sciutu in u 2010, Isabelle Balducchi suvitaia idda u parcorsu di Corsi invistiti in i spittaculi cunsacrati à a mimoria di l’Imperatori, indè l’isula è à l’infora. A stessa rialisatrici cunsacrighja oghji una nova pruduzzioni, Napoléon, insulaire dans l’âme, à a stampa di l’insularità indè l’itinerariu di Bonaparte, da a Corsica à Elba è Santa Elena.

In u 2016, Dumenicu Maestrati hà, in quant’ad’iddu, missu in risaltu, in u ducumintariu Bonaparte côté noir u visu u più bughju di Bonaparte: u so rollu indè u ristabilmenti in u 1802 di a schiavitù è a sanguinosa riprissioni fatta in Haiti, l’anzianu Saint Domingue.

In u 2019, hè inveci una evucazioni micca tragica, quidda di a zitiddina di l’Imperatori, chì hè u sughjettu di u filmu cortu, rialisatu da Isabelle d’Olce. Hè statu giratu in Aiacciu ed’hè Natale Desanti chì intarpritighja u giovanu Bonaparte. U filmu hè bislingui, ancu s’idd’hè in francesu u so titulu, Au commencement.

Ancu sciutu, ma da scopra u 25 di maghju, annantu à ViaStella, u ducumintariu in dui parti, Les Bonaparte, hè l’opara di Marie-Anne Andreani. U filmu hè una cupruduzzioni, fatta trà ViaStella è a sucità di pruduzzioni Mouvement, ma a rialisatrici hè una ghjurnalista di u serviziu publicu corsu di l’Audiovisiu. 

A so inchiesta, basata annant’à monda archivii inediti, rivisitighja u parcorsu di Nabuliò, à partasi di a storia di a so famidda.. Hè idda chì, da a sulidarità clanica di i so membri à a so ambizioni accanita, hà pirmissu à l’unu di i soi d’acceda à un destinu eccezziunali. Ancu s’iddu hè u geniu propiu di Nabuliò chì hà fattu a sfarenza, trà monda altri giovani isulani di prima trinca di i so tempi, hè missu in risaltu da u filmu u fattu ch’iddu ùn avaria avutu a stessa sorti senza u prufilu è l’andatura di i soi.

‘Ss’investigazioni storica di Marie-Anne Andreani, com’una parti maiori di a pruduzzioni corsa annant’ à l’Imperatori, hè in cuntrapuntu incù a visioni, sempri arradicata indè l’Esagonu, di i Corsi “bunapartisti”. U filmu di Dumenicu Maestrati hè ancu u più feroci podassi, fattu contr’à l’isulanu u più cunnisciutu in u mondu sanu. Hè statu rialisatu nanzi ch’idda vultessi in forza, dippò dui anni, u sughjettu di a schiavitù, à riguardu à a priparazioni di a cummimurazioni di u Vintesimu anniversariu di a Leggi Taubira, vutata in u 2001 è chì hè stata una tappa maiori in a ricunniscenza di a schiavitù com’un crimini contr’à l’umanità è a missa in anda di una Ghjurnata chì a ramenta. U filmu di Maestrati hè d’altronda missu in risaltu ‘ss’annu, annantu à u situ di a Fundazioni pà a mimoria di a schiavitù.

Ùn hè inveci micca statu rialisatu un filmu o un ducumintariu annant’à a riprissioni urganizata da Bonaparte in Corsica, guasgi à tempu à quidda di i Caraibi, ancu s’idda ùn si pò di sicura paragunà a viulenza scatinata contru à i rivultati antiesclavagisti è quidda chì hà toccu a Corsica! Hè stata missa quantunqua for’di leggi, for’di a Custituzioni francesa, trà u 1800 è u 1802. A dicisioni di Bonaparte à l’incontru di a so tarra nativa hè stata grava di cunsiquenzi, aldilà bè di u 1802, Hè firmata difatti a Corsica suttumissa à un statu d’eccezzioni, ancu dopu à u 1802, comu ni tistimunighjini i “dragonnades” di u Generali Morand, cunnisciuti supratuttu da a famosa riprissioni in u paesu di l’Isulacciu di Fiumorbu, in u 1808. Ani da essa fatti dipurtazioni di Corsi, in Tulò, chì cruciarani quiddi di i ribeddi di i Caraibi inviati in Corsica!

Ùn hè micca statu par avà missu in maghjini, ne à riguardu à u 2020 ne à u 2021, l’evvenimenti chì hè statu una girata storica, aprendu a porta à a riprissioni di Morand : cuncirnia puri, à doppiu titulu, i cummimurazioni di quist’annu dinò : era u 201u anniversariu di a missa di a Corsica for’di Leggi, da Bonaparte! Hè sempri un tavonu neru di a criazioni audiuvisia. Hè privista quantunqua a so evucazioni, in i cunfarenzi di ‘ssi dui mesi, ma à l’incuntrariu di l’Impiccati di u Niolu, di u 1774, evucati in u filmu Marcu Maria, di Julie Perreard, in u 2012, a riprissioni dicisa da u più famosu di i Corsi à l’incontru di a so tarra nativa, puri monda ducumintata, stà sempri in margini di u campu di a criazioni audiuvisia.

Lire la vidéo

Aldilà di qualchì biotu chì intarrughighjani, affacca un fattu impurtanti à palisà, in a pruduzzioni lucali cunsacrata à Nabuliò : a parti maiò di a criazioni femminili: 6 ducumintarii o filmi, annantu à 8, sò l’opari di rialisatrici!

Antonia Benedetti

  • À veda in altrò : Allindi SVOD pruponi una cullezzioni di filmi à nantu à l’Imperatori

Laisser un commentaire

Corsica.news

GRATUIT
VOIR