Corsica, demugrafia è alloghji …

Pubblicati di Ghjugnu, un studiu di l’INSEE ci dà parechji infurmazioni di pettu à l’alloghji in Corsica. Dipoi u 2016, sò stati numarosi l’articuli à nantu à l’evoluzioni demografica. Mà chi n’hè di st’evoluzioni à riguardu di l’alloghju ? Avemi pruvatu à fà vi un picculu riassuntu capiscitoghju di ciò chì v’avemi buscatu.

In Corsica, trà u 2009 è u 2014, cresci a populazioni di quasgi 19 000 abitanti, +6 %, contra 2.5% in Francia. Quandu s’affaccani 19 000 personi, sò guasgi 24 169 alloghji novi chì escini di tarra, ed’hè un fenomenu chì cresci ogni annu.

Nurmali sta quistioni : « tutt’ognunu t’avarà una casa ? » Saria logica. Mà pò essa ch’innò ! A minimu 54.3 % di st’alloghji novi sò residenzi sicindarii. Riprisintani 37 % di l’alloghji in Corsica, contra 17.7 % in PACA ! …

Evoluzioni di l’alloghji trà u 2008 e u 2015

	2015	2013	2008
Somma	242 100	232 771	208 602
Casi	143 900	138 975	127 711
Casi sicondarii ò bioti	98 200	93 796	80 891

In u 2016, ci hè statu una crescita di 22 % di i custruzzioni, mà u peghju tocca à i permessi di custruì: crescini iddi di più di 102 % !

Antri fatti chì pudemi matriculà : solu 54.3 % di i famiddi Corsi sò per avà pruprietarii di u so alloghju principali, e calani i nasciti : ci n’hè stati 2 913 contra à 3092 morti in u 2016.

Pesu di i casi sicundarii ind’u parcu di l’alloghji di i cumuni in u 2015 : in Aiacciu è Bastia sò più di 58 %.

Pocu à pocu, ci voli à sapè ch’iddu sminuisci u rapportu trà i residenzi occupati.

Pà i residenzi principali : avemi vistu un’antru studiu interessanti di l’Insee à nantu à u so situ internet: Tratta di i « soldes naturels et soldes migratoires ». Si pudia leghja in u 2016 :

« la population augmente principalement grâce à l’arrivée de jeunes ménages. […] Cette augmentation est essentiellement imputable à l’apport migratoire. »

Un antru sciffru : a parti di l’alloghji suciali hè monda più debbuli in Corsica : 424 pà 10.000 abitanti, contra 734 in cuntinenti… E ricchi ùn semi !

Sè t’aveti comu noi a trintina è a vodda di campà quì, sicura chì vi piddarà – com’à noi ! – una pena in capu di quiddi putenti lighjindu st’articulu…