Una impresa à prò di a cultura è a lingua: Allindì

0

Sucetà d’edizioni è produzzioni audiovisia criata trè anni fà in Aiacciu, Allindì hà pà scopu u sviluppu d’arnesi numerichi novi à favori di a lingua è a cultura isulani. U so prughjettu maiori : a missa in anda d’una piattaforma à l’usu Netflix, chì centralizaria i criazioni audiovisii corsi è di u Maritarraniu. 

  • « Scunfinà l’imaginariu di a Corsica »

Eccu quì a brama d’Allindì. L’impresa s’arrimba à nantu à una dinamica chì si voli cursofona è muderna. U so nomi, « Allindì », hè un neologismu in lingua nustrali : vena di « lindu » (chjaru) trasfurmatu in verbu. A vodda d’Allindì hè di simplificà l’accessu à i cuntinuti, produzzioni è coproduzzioni isulani, à un epica induva hè sempri più difficiuli di rittruvà filmi rializati qualchì annu ò mesi fà, postu chì ùn asista nisciunu supportu di ricerca pà tena li. Una situazioni ancu di più paradussali à tempu à a revoluzioni di u numericu. Allindì hà dunqua fattu a scelta di prumova un sistema mudernu è vicinu di i modi novi di cunsumu (Netflix, Amazon, ecc.) chì parmittaria d’avvicinà ‘ssi pruduzzioni audiuvisii da i Corsi.

  • Una piattaforma « SVOD »

SVOD vena da l’inglesi « subsciption video on demand », vali à dì serviziu di filmi è videò à a dumanda. Pò serva ancu d’un cumplementi di diffusioni pà i produttori è criatori isulani. Incù un abbunamenti economicu (4€ ogni mesi), avarani accessu l’utilisatori à l’insemi di i filmi di u catalogu, è pudarani fighjulà ogni emissioni, filmi, documentarii, serii, ecc. À u catalogu d’Allindì s’accunciarani sempri prugrammi novi, incù u scopu di divintà pocu à pocu un veru Netflix à l’usu Corsu. S’accumpagna ‘ss’andatura d’un editorialisazioni putenti di i prugrammi, incù newsletters, bonus, intervisti, ecc. ecc. Accessivuli pà tutti, ‘ssa piattaforma parmettarà ancu à i più vechji, menu avvezzi di i tecnologii novi, d’ammaestrà u serviziu, è di buscà ciò ch’iddi cercani in dui clicchi. S’adattarà dinò Allindì à a qualità di a reta (HD ò SD, pà a fibra ò a 3G), è pocu imprema a macchina (pà via d’un telefuninu, d’un urdinatori, ecc. ecc.).

Un prughjettu cumplessu tandu à u liveddu tecnicu cà ghjuridicu, mà chì parmittaria, sicondu à Maria Francesca Valentini è Gérôme Bouda, i dui co-founders d’Allindì SAS, di risponda un pocu di più à l’imbuschi di dumani, ch’idda sighi pà a salvezza di a cultura corsa ò a spartera d’a noscia lingua.


Lampatu u 1mu d’Austu incù u Festivali di Lama, a piattaforma Allindì SVOD si custruiscia avà pocu à pocu, incù ogni mesi prugrammi novi. Allindì hà dinò rializatu è produttu parechji filmi dipò a so criazioni, chì pudeti veda quì

L'Autori

Laisser un commentaire

Corsica.news

GRATUIT
VOIR