Strema dritta in Corsica: chì visi?

A un annu di i Prisindiziali, indù Marine le Pen ghjunghjaria, à u primu giru, à toccu à toccu incù Emmanuel Macron, à chi n’hè a strema dritta in Corsica, aldilà ancu di u RN? Chi hè u so prufilu, in a campagna di i Tarrituriali?

Giru d’urizonti d’un currenti puliticu à l’arradichera marginali indè i stituzioni pulitichi isulani, ma chi faci tombula, in Corsica, in i voti pà l’elezzioni Prisidinziali è aurupei!

Primu custattu: nè l’una nè l’altra di i dui listi isulani di strema dritta ùn si difiniscini cusi -ma u fattu di ricusà ‘ssa terminulugia hè arradicatu da parechji anni – è ùn’hà un candidatu RN « ufficiali » à u so capu, ciò chi hè inveci novu: à l’ultimi Tarrituriali, u nomi di u partitu lepenistu affaccaia! François Filoni, chi cunduci a lista chi si chjama « Les nôtres avant les autres« , hà quantuqua l’invistitura di u RN, à l’incuntrariu di Jean-Antoine Giacomi, capilista di Forza Nova-Corsica fiera, chi hè statu militenti di ‘ssu muvimentu, ciò ch’ùn’hè mai statu Filoni. ‘St’omu puliticu hè difatti quiddu chi t’hà l’identità ideologica à più scambiarina di tutti i capilisti di ‘ssi Tarrituriali. Sciutu da u PCF, sindicalista CGT eppò FO, rispunsevuli, à a fin’di l’anni Nuvanta, di u muvimentu di Jean-Pierre Chevènement, sucialista « supranistu » francesu è anzianu ministru di l’Internu chi hà numinatu à Bernard Bonnet prifettu di Corsica, François Filoni hè statu elettu in Aiacciu di a Maiurità di manca di Simon Renucci, eppò cunsiglieru municipali è aggiuntu di Laurent Marcangeli, merri di dritta. Ultima girata: s’hè prisintatu contr’à Marcangeli à i Municipali 2020, incù una lista sustinuta da u RN. Un parcorsu sinuosu, dinunciatu da Jean-Anroine Giacomi.

Sicondu custattu: sè u giovanu leader di Forza Nova hè in rumpitura incù u RN, hè difatti più vicina a so lista chi quidda di Filoni da a furmazioni di Marine le Pen, d’indù venini parechji culistieri di Giacomi, com’iddu stessu. Hè à tempu più riprisintativu u so currenti di una strema dritta « curzizata », arrimbata avà à un muvimentu lucali, à l’incuntrariu di Filoni. Hè l’unu di i cofundatori di Forza Nova, Filippo de Carlo, chi hè statu capilista di ‘ssu muvimentu, pà a so prima prisintazioni à una elezzioni. Era à i Municipali di Bastia, in u 2020 è a lista si chjamaia Cittadini corsi. Sò stati debuli i so risultati: 2,07%. A i stessi elezzioni, in Aiacciu, Filoni hà raccoltu 4,41% di i voti, incù u sustegnu di u RN. Dicini ciarti ussirvatori ch’idda saria a dibulezza di i risultati di Filippo de Carlo chi spiegaria u rimpiazziamentu di u primu leader di Forza Nova da Jean-Antoine Giacomi. Hè più giovanu, ma t’hà una casata un pocu più cunnisciuta in u mondu puliticu corsu. U babbu, merri di Prunu, un paisolu di Castagniccia, hè statu u candidatu di u Fn in u 2017, nanzi di rompa incù ‘ssu muvimentu. Avia raccoltu 3 917 voti (3,28%), luntanu à i 14 176 voci (10, 58%) di u FN, à u primu giru di u 2015. St’annu quì, ‘ssu muvimentu, ghjuntu à 9, 09% à u sicondu giru di l’elezzioni, avia avutu 4 eletti à l’Assemblea di Corsica. Era u so gran’ritornu à l’ADC, dopu à 25 anni d’assenza.

Terzu custattu: a situazioni in Corsica hè sfarenti à u Cuntinenti, indù u RN, è aldilà d’iddu d’altri listi di strema dritta, pudarani fà tombula in ‘ss’elezzioni 2021, di pettu à l’allienzi numarosi trà a dritta steriori à a Maiurità Prisidinziali è LaREM, chi pirmeti à a strema dritta di prinsintassi comu l’unica forza d’uppusizioni capaci di traduci a stizza populari contr’à u guvernu. In Corsica, s’hè riunificata a dritta, suttu a bandera di Marcangeli ed’hè una parti di a manca -supratuttu i Radicali- chi s’arritrova alliata à u Partitu d’Emmanuel Macron, chi susteni a lista di Jean-Charles Orsucci. L’hà dittu ufficialmenti Marlène Schiappa, quand’idd’hè vinuta in Bunifaziu. Hè piuttostu dunqui a lista di u merri d’Aiacciu, data da i sundaghji comu in siconda pusizioni dopu à quidda di Gilles Simeoni, chi pudaria aduniscia, aldilà di i voti di dritta, quiddi d’una parti di a strema dritta upposta à u Guvernu ma dinò cintralista è nimica di a maiurità tarrituriali uscenti. In u quadru d’elezzioni lucali, u spaziu puliticu, pà a strema dritta, hè monda più ristrintu in Corsica, à riguardu à u Cuntinenti, fendu contu à a cunfigurazioni di u paisaghju puliticu isulanu. I risultati di i sundaghji, dati u 9 di ghjunghju, sò debuli pà Filoni (4%) è ancu di più pà Giacomi(1%).

Quattriesimu custattu: dippò a partenza di Francis Nadizi, chi era statu l’artisgianu maiò di u sviluppu di u Partitu di Marine le Pen in u 2015, a strema dritta ùn’hà più ritruvatu un leader isulanu veru, à l’incuntrariu di l’altri forzi principali in prisenza: i Naziunalisti, a dritta è u muvimentu centristu di Jean-Charles Orsucci, indù u bulicumi ideologicu hè podassi forti, ma chi hà quantuqua un Capilista cunnisciutu è una basa eletturali, ancu s’idda s’hè ristrinta. Alcunu di i currenti chi riprisenta a strema dritta ùn’hè statu capaci par avà à custruisci una linia pulitica cuerenti è à truvà un leader capaci à accuncià un eletturatu stabili.

Cinquesimu custattu: hè in Corsica Suprana ch’idda affacca, dippò ‘ss’ultimi anni, una vulintà più forti d’arradichera, in u campu eletturali, d’una strema dritta « curzisata », à u discorsu naziunali-populista, chi pugna à ricuparà i voti d’una parti di i Naziunalisti opposti à l’evuluzioni di ‘ssu currenti. S’hè arrimbata, ‘ss’andatura, à una urganisazioni chjamata Leia Naziunali, nata in u 2016. Avia riprisintenti è sustegni in Corsica Suttana dinò, più cunnisciuti ancu, ma quissi si sò missi in daretu o hani scambiatu d’uriintazioni ‘ss’ultimi anni. Leia Naziunali s’hè fatta cunnosci, trà altru, incù u sustegnu purghjatu à l’autori d’una viulenta campagna d’inghjuri è minacci contr’à André Paccou, u riprisintentu isulanu di a LDH, a Liga di i Dritti di l’Omu. U prisidenti di Leia Naziunali, Thierry Biaggi, hè annant’à a lista di Giacomi, com’idd’era dinò annant’à quidda di Filippo de Carlo, à i Municipali di u 2020.

Forza Nova, chi si prisenta pà a prima volta à i Tarrituriali, faci una spalancata trà u Naziunalisimu francesu – d’indù escini una parti di i so fundatori è candidati- è ciarti rivindicazioni di u naziunalismu corsu, senza difinisciasi di ‘ss’ubedienza. Quand’iddu parla u so portavoci di i « fondamentaux nationaux », hè à quiddi di a Francia di strema dritta ch’iddu faci rifarenza. Hè indè idda chi Forza nova ha presu u so ADN.

Una girata à 180°

Monda elementi di linguaghju di u muvimentu di Giacomi sò quiddi di u RN, ancu s’iddu rivindichighja un « souverainisme corse ». S’iddu ricusa intantu l’Independenza di l’isula è a so autodeterminazioni, si dichjara favurevuli à una evuluziuni chi li pirmitaria di dutà l’isula d’un statutu federali vicinu à quiddu di i länder tedeschi. Una pusizioni in rumpitura incù quidda di Filoni ma dinò incù quidda ch’iddi rivindichiani sin’à pocu i so militenti, favurevuli, comu u RN, indù erani, d’un cintralisimu forti, d’una « France une et indivisible ». Pà monda d’iddi, u discorsu federalista di Giacomi hè una girata à 180°…

E par altru, ancu s’iddu si dici Forza Nova in rumpitura incù u RN, affacca una rifarenza simbolica putenti à a storia di ‘ssu muvimentu, in u so nomi stessu : u so acronimu hè listessu à quiddu di u FN, l’urganisazioni fundata da Jean-Marie le Pen in u 1972… Vistica subliminali o vulintà di situassi bè in u filu di ‘ssu currenti, nanzi u tentativu di Marine le Pen di dà li un visu più prisintevuli, difficiuli à dì.

Forza Nova hè dinò l’omonimu guasgi parfettu… d’una urganisazioni fascista taliana, Forza Nuova, nata in u 1997 è disciolta ss’ultimi tempi. Pocu prubabili ch’iddi ùn’ l’avissini cunnisciuta i fundatori di u muvimentu isulanu, fendu contu à a prussimità geografica di l’Italia è à i polemichi indè l’Attualità à riguardu à ssu FN cusi vicinu.Vò dì chi a sumiddenza dinuminativa ùn’l’ha micca diranghjatu.

Par avà, inveci di liticassi incù i so nimichi pulitichi, hè trà iddi ch’iddi si sò amurciati i dui capilisti isulani di strema dritta. U tazzu hà cuncirnatu u 63u candidatu di a lista di Giacomi, Christian Ayela. ‘Ss’anzianu cumbattenti di 85 anni era sempri membru di u RN quand’idda hè stata dipusitata a lista di Forza Nova in prifittura. Hè statu dunqui dumandatu à u candidatu di ritirassi di ‘ssa lista, da i rispunsevuli di u RN. L’ha fattu in una prima lettara, rimissa à a prifittura, nanzi di scrivani una siconda, u lindumani, dicindu ch’iddu staghjia incù Giacomi! Aldilà di a polemica, u prufilu di u candidatu, anzianu militari è membru di u RN sin’ad’oghji, hè una antra tistimunianza, trà parechji, di l’arradichera in a strema dritta triculora di a lista di Forza Nova, macaru u so novu versu « curzistu ».

‘Ssi Tarrituriali ghjuvarani à palisà u raportu di forzi trà i dui listi isulani di strema dritta, ma prubabilmenti pocu à misurà u sviluppu di l’idei di ‘ssu currenti puliticu. U quadru di l’elezzioni lucali, ancu di menu oghji, ùn’li pirmittirà soca micca d’uttena risultati significativi. Hè difatti à l’uccasioni di i Prisidinziali è di l’Aurupeani ch’iddu si pò veda in Corsica a so crescita, cuntinua, dippò u 1988.

S’idda ùn’ s’arridichighja micca a strema dritta par avà in i stituzioni pulitichi isulani o à faci solu di modu punttuali è ristrintu, comu in u 2015, incù 4 eletti à l’Assemblea di Corsica, i so idei si sparghjani inveci, di più in più, in isula dinò, à tempu à u rinforzu d’un buliumi ideologicu. I ribombi d’una « lepénisation » di u discorsu si facini senta in i reti suciali, di modu di più in più forti. Hè difatti l’arradichera naziunalista chi hà bluccatu u sviluppu di a strema dritta in u campu puliticu, comu furmazioni custituita. ‘Ss’inchjustratura d’ordini stituziunali ùn’impidisci a sparghjera, in a sucità, di l’idei vinuti da u currenti di Le Pen: u razzisimu, l’antisemitisimu, l’odiu contr’à l’urganisimi chi difendini i dritti di l’omu, a zerga contr’à i Naziunalisti quand’iddi scumbattini pà ‘ssi dritti, comu par esempiu quand’iddi hani chjamatu à l’aiutu à i bateddi di migranti è a u so accogliu.

Hè cunsidaratu oghji comu irrispunsevuli, da ciarti ussirvatori pulitichi, u fattu di rassicurassi à riguardu à l’udienza sempri debuli di a strema dritta in i stituzioni isulani, dicindu chi a crescita di i voci pà u RN à l’elezzioni aurupei è Prisidinziali o aurupeani, saria solu « un vote de protestation ». ‘Ssu votu, è ancu di più a so alzata cuntinua è maiori, t’hani un sensu. A l’ultimi Prisindiziali, in Corsica, Marine le Pen hè ghjunta in capu à u primu giru, incù 27,88%, è ha raccoltu 48,52 % di i voti à u sicondu giru… I so risultati sò stati superiori di 15 punti à a media arrigistrata in Cuntinenti! Un fattu storicu chi devi primurà, qualsiasi u risultatu di i listi Filoni è Giacomi à ‘ssi Tarrituriali.