Lista Marcangeli: u « soffiu novu » di l’Uppusizioni

Dippò u principiu di a campagna di i Tarrituriali, Laurent Marcangeli hà suvitatu incù assicurenza u so filu, missu in risaltu da a so lista, chjamata Un soffiu novu: riunificà a Dritta è attirà ad’iddu una parti di u centru è di a manca, pà pusiziunassi comu à l’alternativa principali à a Maiurità uscenti. U sundaghju Ispos, à principiu di ghjunghju, l’hà pusiziunatu à a siconda piazza, à 23% di l’intinzioni di votu, solu dui punti darettu à Gilles Simeoni.

Aldilà di i mezi maiò chì li dà u so statutu di merri di a « capitali tarrituriali » è amministrativa di a Corsica, chì t’hà a suprana dinò annantu à a CAPA, Laurent Marcangeli binificighja d’un cuntestu puliticu monda favurevuli: a disunioni naziunalista è i cuntradizzioni di a lista Orsucci, intrappulata trà u sustegnu chì li dà u Guvernu è a so arrimbata à una parti di a Manca, à l’arritrosa annant’à ciarti idei pà a Corsica ch’iddu difendi u merri di Bunifaziu. Laurent Marcangeli ùn hè micca cunfruntatu à cuntradizzioni simuli. Hà da pudè cusì attirà un eletturatu – di u centru ed ancu di manca – in zerga contr’à u Guvernu francesi o a maiurità tarrituriali. Cusì hè pà a muvenza riprisintitata da u MCD, Mouvement Corse Démocrate, di François Tatti, una ala custitutiva di l’anziana manca bastiaccia, chì s’hè ralliata à Marcangeli.

‘Ssu sviluppu di i sustegni di u merri d’Aiacciu in Corsica Suprana, è in una parti di u campu sin’à pocu custitutivu di u « Clan » di manca, hè storicu. Signa l’implusioni ultima di ‘ssu campu, principiata da u 2015. Affacca oghji annant’à u tarrenu, incù l’accogliu ricivutu da Marcangeli in Bastia, citadella di u vechju « Partitu Biancu« , laicu è ripublicanu, tantu uppostu, da u principiu d’u XXu, à u Partitu Neru in i tempi clericali è in mani trà altru à i … Bunapartisti.

Aldilà d’una ala di a manca, Marcangeli pugna à aduniscia suttu a so bandera, in Bastia quant’à indè parechji lochi, da u Nordu à u Suttincu, sustegni di diversi urizonti chì sò favurevuli à una « dicintralisazioni interna » di a Corsica, arrimbata à l‘Intercumunalità, chì divia essa missa in anda da a « Chambre des Territoires », vulsuta da i Naziunalisti è prisintata da u merri d’Aiacciu comu un « gadget » in a so versioni ughjinca. A brama di Marcangeli di « retrouver une garantie de représentativité des bassins de vie dans la gouvernance de l’Institution » trà altru incù a mudificazioni di u modu di votu à l’Assemblea di Corsica, hè una scelta chì pò avè ribombi numarosi aldilà di i campi ideologichi.

Vidéo du meeting de Laurent Marcangeli à Ajaccio

Aldilà di i punti di u prugramma di Marcangeli chi poni essa visti comu fundati ancu da i so adversarii pulitichi – a scumissa di u sviluppu agriculu, di l’ambienti, di a saluta, ecc. – , s’ingaghja u merri d’Aiacciu in una andatura menu cunsensuali, più marcata a dritta è contr’à u Padduc. U vò rimetta in causa, chì impidisciaria monda merri d’elaburà u so PLU. U smanteddamentu di ‘ssu Pianu emblematicu, allora chì a speculazioni immubiliaria hè dighjà trimenda ancu incun’iddu, affacca comu a parti a più polemica è sulfurei di u prugramma di u merri d’Aiacciu, pà i so adversarii di parechji urizonti.

Forza hè di ricunoscia chì a pulitica pricunizata da Marcangeli, à riguardu à u Padduc quant’ad’altri quistioni, t’hà almenu un meritu: alzà i culori d’u so campu senza piattà li, à l’incuntrariu d’altri candidati. Sò quiddi di a dritta ultraliberali.

U dialogu incù u Statu Aldilà di u tarrenu immubiliaru, u merri d’Aiacciu militighja pà un Pianu di rilancia economica incù u Statu, accusendu a Maiurità tarrituriali uscenti d’avè lacatu ‘ssa quistioni à malavia. Metti in risaltu dinò ciò ch’iddu cunsidarighja comu i punti neri di a gestioni naziunalista, trà altru u cartularu di i Frazi, prinsintatu comu una di i so scunfitti maiò. Pricunisighja par altru Marcangeli u ristoru d’un veru « dialogu incù u Statu », ramintendu passendu a so uppusizioni à u discorsu naziunalistu, ch’idd’ùn intazza puri micca franca à chjara. Sè Gilles Simeoni hà idintificatu a lista di u merri d’Aiacciu comu a so unica nimica, arrisponda Marcangeli ch’idd’ùn hà « qu’un seul adversaire, l’échec de la Corse ». Risirvighja puri i so cacciati i più vilanosi à u Prisidenti di l’Esecutivu uscenti, « héritier d’une dynastie », à la tête d’un « système claniste et clientéliste »…

U sicondu giru

Pà u sicondu giru, dici Marcangeli ch’idd’ùn hà ancu principiatu i discussioni incù i so partinarii pussibuli… A so lista hè intantu vista da a maiò parti di l’ussirvatorii comu a sola chi pò poni prublemi à quidda di Gilles Simeoni.

A a sera di u primu giru inveci, a lista di Femu a Corsica avarà, incù l’altri listi naziunalisti, alliati più naturali è chì riprinsintarani soca una mansa d’elettori più larga ch’iddi ni cuntarani l’alliati pussibuli di Marcangeli. Cusì sarà s’iddi ghjunghjini à sfrancassini di i so divisioni, ciò ch’ùn hè micca sicura. U merri d’Aiacciu hè dicisu bè intantu à sciappà a maghjina d’ « imbattable », troppu data a u sò parè à Gilles Simeoni.