Lista Simeoni: « Fà populu insemi »

0

Tinuta sicreta sin’à l’ultimu, a lista di Gilles Simeoni, u Prisidenti di l’Esecutivu à l’Assemblea di Corsica, hè stata prisintata u 16 di maghju in Corti. Era monda aspittata, pà via di l’impurtenza di u so capu è di u muvimentu ch’idd’hà fundatu, Femu a Corsica. Hè a furmazioni a più putenta oghji in u mondu puliticu isulanu.

A prisintazioni di a lista, chi si chjama Fà populu inseme, s’hè fatta in Corti, una scelta cumuna à tutti i furmazioni naziunalisti.’Ssa lucalisazioni rinvia à Pasquale Paoli è à u rollu di a città tempa’ll’Indipindenza di l’isula. U stessu ghjornu cà Simeoni, u muvimentu di Jean-Guy Talamoni, Corsica Libera, era anch’iddu d’altronda in Corti da prinsintà i so candidati, ma in a dopumeziornu, mentri ch’idd’era in a matina l’appuntamentu di Femu a Corsica. 

I listi di Simeoni è Talamoni t’ani nomi chì assumiddani in u so intitulatu, ma s’idda parla a lista di Corsica Libera di « Fà Nazioni » , quidda di Femu chjama à « Fà populu inseme ». Sò dui prughjetti più sfarenti ch’idd parini. U populu hè una cumunità storica è culturali, mentri chì a nazioni rinvia di più à una entità pulitica, affaccata in a so cuncizzioni muderna, in u XVIIIu è in l’uccurrenza in Corsica incù Pasquale Paoli. A lista di Talamoni metti in risaltu ‘ssa diminsioni di custruzzioni pulitica è stituziunale, chi pò piddà a forma di l’autunumia o di l’indipindenza, mentri chi u nomi di a lista di Simeoni  significhighji ch’idda si primurighji di di più di i dinamichi suciali è culturali chi pirmettini di custituiscia una Cumunità, micca solu « di sangui », comu u suggirighja a parodda « inseme ». 

  • Eccu u riportu di Anne-Marie Leccia, suvitatu di l’intervista di Gilles Simeoni,
    diffusatu à nantu à ViaStella

Aldilà di u discorsu, hè sfarenti dinò u prufilu di a lista Femu a Corsica à riguardu à quiddu di a lista  di  Corsica Libera. Hè più fatta à « candidati d’apartura », mentri ch’idda s’hè ricintrata quidda di Jean-Guy Talamoni annant’à militenti. Trà i parsunalità chì s’arritrovani quist’annu in i ranghi di a lista Simeoni, affaccani Alex Vinciguerra, u Prisidenti di a Cadec, Louis Pozzo di Borgo (Prisidenti di a Cab), Noël Dominique Livrelli (Prisidenti di l’Intercò di u Celavu-Prunelli), è parechji merri di Corsica Suprana, aldilà di Paul-Jo Caitucoli, merri d’Argiusta è Antoine Peraldi, di Currà. 

Alex Vinciguerra, Louis Pozzo di Borgo, Noël Dominique Livrelli, Paul-Jo Caitucoli è Antoine Peraldi

A prisenza di ‘ssi candidati d’apartura faci assumiddà a lista di Simeoni à quidda di Jean -Christophe Angelini, di pettu à i dui altri listi naziunalisti principalement fatti à militanti, quidda di Corsica Libara è quidda di Cori in Fronte

Oghji, Gilles Simeoni vo falla finita incù i polemichi ligati à l’implusioni di a cualizioni Pè a Corsica. Palesa u fattu ch’iddu ci c’hè, pà i Naziunalisti, un unicu adversariu d’impurtanza indè ss’elezzioni: u candidatu di a dritta, Laurent Marcangeli. 

U scopu di u leader di Fà populu insemu hè un votu maiò pà a so lista, da u primu giru, chi cunfirmaria  a so praputenza. Pari incuntistabili, ancu s’idda po essa ristrinta da a disusioni naziunalista è da l’alzata di u votu pà a dritta riunificata.

L'Autori

Laisser un commentaire

Corsica.news

GRATUIT
VOIR