Da l’attualità à a Storia – « OMBRE ROSSE » : STRADIZIONI IN ITALIA ?

Veni di riaffaccà indè l’Attualità a quistioni di a stradizioni di militanti di i Brigate Rosse ed’ altri urganisazzioni di strema manca, rifughjati in Francia dippò una quarantina d’anni. Deci parsoni sò cuncirnati. Una d’iddi hè sempri ricircata par avà. Devini essa rimissi – o micca- à a Ghjustizia taliana, dopu à l’esamini di i fatti rimpruvarati è di a validità di i dumandi di stradizioni. Hè stata dicisa ’ssa prucidura dopu à niguziazioni trà Pariggi è Roma. Ritornu annant’à una spittaculari girata di u Statu francesu, è infurmazioni inediti.

Hè in u 1985 ch’iddu s’era ingaghjatu u Statu francesu, pà a voci di François Mitterrand, à ricusà a stradizioni di l’attivisti taliani di strema manca accusati d’attentati tempi à l’Anni di Piombu. Un imperativu pà benificià di ’ssa prutizzioni : rinunzià à a lotta armata.

Da ’ssi tempi è sin’ad’oghji, sò stati accittati solu dui dumandi di stradizioni, in u 2002 è 2009, annant’à i 200 prisintati da l’Italia ! L’una era quidda di u famosu Cesare Battisti, ma si n’era scappatu in u 2009 in Sud’America, nanzi d’essa arristatu in Bulivia in u 2019 è mandatu in Italia.

A fiertà di u Ministru…

Oghji, i parsoni cuncirnati pà i dumandi di stradizioni sò deci. Trà iddi, ci sò dui donni, Roberta Capelli, 69 ans è Marina Petrella, 66 anni. Nicolas Sarkozy s’era uppostu à a sò stradizioni in u 2008, pà via di i prublemi di saluta ch’idda t’hà. Marina Petrella hè stata cundannata in contumacia, in Italia, à a prighjò sin’à a fin’di a sò vita. U ministru francesu di a Ghjustizia è anzianu avucatu, Eric Dupond-Moretti, s’hè dittu « fieru » pà contu soiu, di participà à ’ssa prucidura di stradizioni. Pà l’Eliseu, ùn hè mancu stampa in rumpitura incù a « duttrina Mitterrand », chi i militenti cuncirnati sò accusati di crimini di sangui, un prufilu chi, tiuricamenti, l’impidia di beneficià di a prutizzioni di Pariggi.

In rialità, Pariggi, opposta à ciarti pruciduri ghjudiziarii taliani contr’à a strema manca, ùn hà micca straditu dinò i parsoni ricircati pà attentati indù hè corsu u sangui. Ni tistimunighji par esempiu u prufilu di Marina Petrella, cundannata da u 1993 pà crimini di sangui : in u 1994 -tempi dunqui à a Cuabitazioni- hè dumandata da l’Italia a so stradizioni. U so indirizzu in Pariggi era cunnisciutu, chì l’avia data à u Prucuratori, à a dumanda di a so avucata : ùn hè puri stradita. Cusì sarà dinò, anni è anni, pà Cesare Battisti, è monda altri comu Roberta Cappelli o Alvaro Lajocono, arristatu in u 2000… in Corsica.

«Un tradimentu innumabili di a Francia »

A Francia accurdaia dunqui bè a so prutizzioni ancu à i militanti chì aviani fattu corra u sangui. Hè dunqui bè una rumpitura ch’iddu faci Emmanuel Macron incù una tradizioni pulitica rispittata, da i Guverni di Manca ma dinò di Dritta !

Accilirighja ancu a so azzioni, à a dumanda di i Taliani, pà impidiscia ch’iddi a si sfranchessini di a prighjò ciarti anziani attivisti, pà via di a priscrizzioni. Pà l’unu, chì hè ricircatu oghji, era privista u 15 di maghju ! Pà d’altri, saria vicina dinò. À u Guvernu talianu, l’hà fattu prò dinò l’uparazioni, monda mediatizata. Hà dunqui salutatu a « dicisioni storica » di Pariggi, chi sarra una vechja litica trà i dui Stati.

Pà Ma Irène Terrel, l’avucata di cinqui anziani militenti cuncirnati, a decisioni d’Emmanuel Macron hè « un tradimentu innumabili di a Francia ». Hà dittu à l’AFP a so indignazioni : « Dippò l’anni Uttanta, ‘ssa ghjenti era suttu à a prutizzioni di a Francia, ani rifattu a so vita quì da 30 anni, sò stallati ufficialmenti, è tuttu ognunu à sapia, incù i so fiddoli è bisfiddoli… è una mattina, si veni à arristalli, 40 anni dopu à i fatti ? Hè innumabili è irricivibili in drittu » !

Aldilà di ciarti avucati, solu si sò alzati publicamenti uni pochi di voci in Francia contr’à ‘ssa prucidura, da a France Insoumise à a Liga di i Dritti di l’Omu è u Cullettivi di strema manca Bellaciao.

Vindetta si Statu

Si dumandani l’usservatori chì sò i veri mutivazioni d’Emmanuel Macron. Pà ciarti, i prughjetti di stradizioni sò una uchjata à l’elettori di Dritta, nanzi à i Prisidinziali. D’altri puntani dinò à a vodda di riscaldà i so rilazioni incù Roma, monda tesi ‘ss’ultimi anni. U Prisidenti di a Ripublica vularia appacià li pà rinfurzà l’Assi francu’talianu, impurtantissimu in a so visioni ughjinca di i sfidi aurupei novi, securitarii è geupulitichi.

In quant’à l’Italia, à l’incuntrariu di monda altri paesi marcati – comu a Francia – da u passatu di a viulenza pulitica, ùn hà mai missu à l’ordini di u ghjornu a quistioni di l’Amnistia. U Puteri talianu ricusa sempri ‘ssa via, pà girà a pagina di l’Anni di Piombu. Faci una missa in risaltu permanenti di l’ombri di a viulenza rossa, da impidiscia u novu sbucciu di rivindicazioni suciali radicali. Hè cunfurtatu oghji, in a mediatisazioni di una vindetta di Statu intarminabili, da u Prisidenti di a Ripublica francesa, chi rompi incù tutti i so pridicissori, di manca è di dritta, annant’à ‘ssa quistioni monda simbolica di i stradizioni.

Svultera storica

Di chì hè u nomi, ‘ssa rumpitura storica di Macron à riguardu à ‘ssa quistioni ? Chi pinsà di una svultera diplumatica simuli, à riguardu à « l‘Auropa di a Ghjustizia » ch’iddu prumovi ? S’iddu hè rimissu in causa l’asiliu puliticu, pà parsoni chì ani rifattu a so vita in Francia è chì ùn scumbattini più in u campu puliticu dippò 40 anni, chì ni sarà cuncirnindu à d’altri, ghjunti da pocu in Francia è opposti in u Prisenti à Guverni antidemocratichi chì dumandarani a so stradizioni ?

U Ministru di a Ghjustizia Dupond-Moretti hè prontu, pà contu soiu, à girà senza aspittà di più a pagina di l’anziana prutizzioni data à l’attivisti taliani di strema manca. « Je n’ai strictement aucun état d’âme », l’hà ditta franca è chjara.

Hà da essa intantu longa a prucidura. Si dici chì un annu è mezu almenu saria nicissariu pà l’esamini pricisu di i deci dumandi di stradizioni, nanzi di metta -o micca- in manu à u Statu talianu i parsoni cuncirnati, pà un viaghju chì pudaria essa senza ritornu… Ùn ani podassi più da veda a libartà, o solu indè l’ultimi anni di a so vita, à riguardu à i so cundanni, à a so età è, pà ciarti, i so prublemi di saluta.

Par avà, i deci anziani militanti, à l’infora d’unu chi hà « piddatu a machja », sò stati libarati pocu dopu a so interpellazioni, ma missi suttu cuntrollu ghjudiziariu strittu.

Zitti è muti

In u passatu, sò vinuti in Corsica parechji Brigatisti. Unu, Alvaro Lojacono, chì t’hà a naziunalità svizzera, era scalatu dopu una incarcerazioni da u 1989 è u 1999. Hè statu arristatu in u 2000 in Balagna, indù a mamma avia una risidenza. Hè statu prisintatu comu ligatu à l’assassiniu d’Aldo Moro -u famosu omu puliticu talianu tumbatu in u 1978- ma sò stati abandunati ‘ss’accusazioni. Ùn hè micca statu straditu, ma libaratu, dopu à cinqui mesi à a prighjò di Borgu. Si n’hè andatu dopu da Corsica.

Un antru anzianu Brigatista hà fattu inveci ceppu indè nò. Ùn hè micca cuncirnatu da a stradizioni. A so pena hè priscritta da u 2013. L’autori di ’ss’articulu ùn hà micca pugnatu à cuntattà lu, fendu contu à a dimensioni monda sinsibuli di u sughjettu è à u silenziu di l’intirassatu annant’à ’ssa quistioni.

Sò zitti è muti difatti oghji monda esiliati taliani di strema manca, à riguardu à a situazioni è a drittisazioni ambienti . S’iddi sò stati pruteti 40 anni, nudda ùn hè scrittu in a leggi, mancu a « duttrina Mitterrand», ch’ùn hà dunqui micca valori ghjuridica.

I Rossi è i Neri

Dopu à tanti anni, a situazioni di l’anziani attivisti taliani intarrughighja. Cusì dici l’Universitariu Alessandro Stella, anch’iddu esiliatu in Francia, ma à a situazioni rigularizata da parechji anni, in una interview data à u ghjurnali La Montagne, à a fin’d’aprili di u 2021 : « On va arrêter des gens 40 à 50 ans après les faits. Hormis contre Klaus Barbie et quelques dignitaires nazis, dans quel pays et contre qui dans le monde a-t-on appliqué cette loi imprescriptible de vengeance ? »

In Italia stessa, sò stati amnistiati in u 46 i fascisti Mussoliniani da u ministru cummunistu di a Ghjustizia, Palmiro Togliatti ! In Francia, i Cullaburatori di i Nazi, ancu cumprumissi in affari gravissimi, sò stati amnistiati trà u 47 è u 53.

Guasgi un mezu seculu dopu à l’Anni di piombu, hè inveci à a morti in prighjò ch’iddi parini distinati l’attivisti rossi di ‘ssi tempi, incù l’aiutu d’Emmanuel Macron. A so prisintazioni pà l’unu di i principali attori di i so prubabili stradizioni ni dici monda annant’à a disinfurmazioni maiò à u so incontru. In una interview à a televisiò, u Ministru di a Ghjustizia hà difatti attribuitu à u so currenti, a strema manca, tutti i vittimi taliani di l’Anni di Piombu ! Dicini puri i spicialisti di’ssa storia chì più di a mità di i morti hè ligata à l’attentati di a strema dritta…

L’azzioni a più sanguinaria, quidda di a gara di Bologna – 85 morti è 200 feriti – veni d’idda, strumintalizata da i reti Stay Behind di l’Otan, indiati tandu in una « strategia di a tensioni » in Italia. Sò pocu l’autori è i cumanditarii di u Tarrurisimu Neru -ligati à ’ssi reti chjamati in Italia Gladio- ad’essa stati incarciarati, ghjudicati è ricircati, o ani binificiatu di una reduzzioni di i so cundanni, à l’incuntrariu di i so nimichi.

Contr’ad’iddi, a caccia, fatta avà mano en la mano da Pariggi è Roma, hè rilanciata oghji. U nomi datu à l’Uparazioni ? « Ombre rosse » ! In quant’à l’Ombre Nere, u lumi chì ferma à fà annantu ad’iddi ùn hè più à l’ordini di u ghjornu.