Lista Core in Fronte: l’outsider naziunalistu
A lista dirighjita da Paulu Felice Benedetti, inrigistrata ufficialmenti u 14 di maghju, era stata a prima di i Naziunalisti ad’essa prisintata in a so integralità, u 9 di maghju. Si chjama Da per noi.
Hè a sola steriori à l’anziana cualizioni Pè a Corsica. Core in Fronte, chì s’era prisintatu solu à i pricidenti elezzioni Tarrituriali, ùn avia micca avutu elettu dipò u 2015. Sin’à tandu, Paul-Félix Benedetti era statu Cunsiglieru à l’Assemblea di Corsica, in tantu ch’elettu di Corsica Libera, ma s’era scantatu di s’ssu muvimentu in u 2012.
Si palesa, in ‘ssa lista outsider, monda attiva annant’à u tarrenu, a prisenza di qualchì candidatu d’apartura, ma a maiò parti sò militenti da parechji anni. S’arritrovani nomi cunnisciuti di u mondu naziunalistu, comu Paul Quastana, in 5a posizioni. Era unu di l’anziani eletti di Corsica Nazioni à l’Assemblea di Corsica, tempa’ll’Accordi di Matignon. Veni da a Cuncolta Naziunalista, ligata à u Flnc Canale Storicu, dopu à l’implusioni di l’urganisazioni clandestina in fazzioni antagonisti.
Frà mezu militenti di a nova generazioni, s’affacca, indè a lista di Core in Fronte,, u nomi di Serena Battestini, chì era sin’ad’avà in i ranghi di Femu a Corsica. Era stata ancu eletta di ‘ssu Muvimentu à i Municipali di Bastia.
Hè a fiddola di « Nanou » Battestini, unu di i primi militenti di u FLNC, incarciaratu à a fin’di u Sittanta è chì hà firmatu, pochi tempi fà, a lettara publica à l’eletti di a CDC, scritta da naziunalisti storichi.
Serena Battestini, in quant’ad’idda, era stata quand’idd’era giuvanetta, una di i primi portavoci di u Manifeste pour la vie, u muvimentu di donni chì s’era custituitu, à a mità di l’Anni Nuvanta, pà dumandà di falla finita incù a viulenza, a leggi di l’armi, è l’assassinii chì insanguinaiani tandu a Corsica è i ranghi naziunisti stessi.
A lista ughjinca di Core in fronte palesa una adunita di militenti vinuti d’urizonti naziunalisti diversi, aldilà di i so ranghi fundivi, prova d’una alarghera di a basa di l’urganisazioni di Paul-Félix Benedetti. Di pettu à a rumpitura di a cualizioni Pè a Corsica, è a zerga di monda naziunalisti à riguardu à a gestioni di a CDC fatta da l’eletti ughjinchi, riprisenta un currenti chì pò imponasi annant’à scena naziunalista incù una putenza inedita. I so risultati custituiscini unu di i fatti più difficiuli à prefigurà, pà l’analisti di ‘ssa campagna eletturali.
L'Autori
