Citadella d’Aiacciu – Era ora !

S’hè aparta a citadella Miollis à l’Aiaccini ‘ssu 4 di luddu. Hè un evenimenti storicu maiò, è monda emblematicu pà l’Aiaccini chì poni avà scopra ‘ssu locu scunnisciutu, ch’idd’hè vultatu prupietà di a cità dopu à più di 20 anni di straziu amministrativu.

Eccu quì u nosciu picculu filmettu, rializatu in dronu incù @Spassighjata20

A storia di a citadella

Edificata da i Genovesi à a fini di u 15imu seculu, a citadella saria a prima custruzzioni di a cità d’Aiacciu. Monda chjuca à l’iniziu, hà da crescia pocu à pocu sin’à a fini di u 16imu seculu, da divintà l’edifiziu chì nò cunniscemi oghji. Si stendi a citadella à nantu à 2,5 ettari, incù circa 10 500 metri quadrati custruitti in u centru cità. Occupata fin’à pocu da l’armata, hè quasgi sempri statu un locu sarratu, induva l’aghjenti ùn pudia mancu entra. S’hè aparta avà, incù u so riacquistu da a cità.

Un prughjettu di 20 anni…

20 anni fà ch’iddi provani i sfarenti mandaturi municipali ad’impatruniscia si di sta citadella ! In u 2005, sottu à Simon Renucci, aviani mancatu l’occasioni d’uttena la pà l’euro simbolicu. Parchì ? Ci vulia nanzi à metta in anda parechji cartulari monda pisii : dumandi d’aiuti, diagnostichi, studii storichi, classificazioni munumenti storicu, stabilisciamenti di marcati publichi, ecc ecc… Dopu à ‘ssu fiascu, u prezzu annunziatu da u Ministeru – 12 millioni – paria monda troppu altu.

Quand’hè vultatu ‘ssu cartulari à nantu à u scagnu di Marcangeli, paria sempri inaccessivuli a citadella. Hè solu parechji anni dopu, quand’erani compii tutti ‘ssi dimarchji, chì a rilancia di i negoziazioni incù u Ministeru hè stata pussibuli.

In u 2019, hè datu mandatu à u merri da u so cunsigliu municipali (dicisioni di u 15 d’Aprili) pà discorra di l’ultimi punti di a negoziazioni incù u Ministeru di a Difesa. Dui mesi dopu, era finalizatu u trasferimentu di a citadella da u Statu à a cità… Avia dittu tandu Laurent Marcangeli ch’una piccula parti di a citadella pudaria essa aparta nanzi a fini di l’annu, è chì a so inaugurazioni ufficiali si faria pocu dopu… Ma à mezu ci hè statu a pandemia !

Quant’hà custatu ‘ssa citadella?

Avia stimatu u Statu l’insemi di a citadella à 2,5 millioni d’€, ma hà piddatu iddu in carica a depulluzioni di u duminiu, stimata à 1,1 millioni. In fini, hà custatu 1,4 millioni à a municipalità, una somma monda alluntanata da i 12 millioni privisti nanzi. Era stata à l’epica salutatu ‘ss’arrigulamenti da l’insemi di i cunsiglieri municipali, ch’iddi sighini di a maghjurità ò di l’oppusizioni.

Trè impegni maiò

S’erani missi d’accunsenti l’eletti à nantu à trè impegni maiò pà a citadella :

U primu era ch’idda tinissi a so anima, è ch’idda sighi prutetta.
U sicondu era di custruì u prughjettu glubali incù l’Aiaccini : ci hè statu una cunsultazioni publica.
Pà compia, l’attu di prupietà divia firmà solu à a Cità.

Manca pinsà dunqua di venda la à un impresa maiò comu era corsa a vuciata nanzi ! Ci sarà quantunqua una struttura turistica fastuosa. Dopu à una chjama à pruposti auropea, Si sà ch’aviani rispostu almenu dui gruppi : Accor è Hilton. À senta ciò chì si dici, s’iddu saria statu ritinutu u gruppu Accor, pari ch’iddi avariani fiascatu sin’ad avà i negoziazioni.

A sirata d’inaugurazioni u 4 di luddu

Sò stati urganizati parechji riprisintazioni culturali, missi in anda da a SPL Ametarra è a cità d’Aiacciu, ma sempri riflittuti incù a vodda d’arradicà si in ‘ssu locu simbolicu, comu a pussibilità di lacà a so stampa à nantu à un’opara artistica chì firmarà in citadella !