Juliana Quilici è Nicolas Pappalardo, spezialisti di piano, ani inauguratu in Aiacciu à u principiu di u mesi u so cumerciu è atteddu : Passioni Piano. Un negoziu raru è atipicu, chì apra in tempi stranii, ch’idda sighi à u liveddu economicu è sanitariu, in u centru d’Aiacciu.

Quattru anni dighjà ch’idd’hè vultata à stallà si in Aiacciu Juliana Quilici. Dopu à deci anni di furmazioni è di perfezziunamentu trà Le Mans è Parigi, hà fattu a scelta d’apra a so sucetà, Passioni Piano, in a so città di nascita. Dippò ‘ssu ghjornu, faci a tragulina in a Corsica sana è pratichighja a so passioni.

  • U parcorsu di Juliana

Juliana ghjunghji in Parigi à 14 anni, pà compia i studii di musica principiati à u Conservatoriu d’ Aiacciu. Dopu, cummincia una furmazioni pà divintà « tecnica di piano », in imparera in una sucetà spicializata monda cunnisciuta in Parigi chì si chjama Juste un piano. L’Aiaccina pruponi i so servizi à cunservatorii è cuncertisti maiò. U so scopu ùn scambia micca: furmassi u più pussibuli nanzi di vultà à travaddà in Corsica.


L’apartura di ‘ssu cumerciu, lucalizatu 1, stretta di l’Assunta, hè, pà a ghjuvanetta di  28 anni, una sfida maiò. In più d’un locali, incù Nicolas, invistiscini in un camiò da prupona servizi di rinnuvazioni più impurtanti.

  • Nicolas M. Pappalardo, tecnicu di piano è chitarra

Nicolas principia a so imparera à 14 anni incù una furmazioni di liutaiu.  Dopu à 4 anni, accuncia à ‘ssu sapè fà un imparera di tecnicu di piano, trà Le Mans è Parigi. Pò avà fà rigulamenti, riparazioni è risturazioni à nantu à i chitarri è i piano. ‘Ssi cunniscenzi li parmittighja di travaddà incù l’artisti i più famosi. Nanzi di stallà si in Corsica, cuntinuighja à perfezziunà a so maestria in Italia.

Passioni Piano est ravi d’accueillir Nicolas M.-Pappalardo technicien piano et guitare. Il rejoint l’aventure avec… Publiée par Passioni Piano sur Vendredi 18 septembre 2020

U cumerciu pruponi servizi numarosi, da a riparazioni à a vendita di parechji stumenti.

In più di i servizi “classichi” di regulamentu, riparazioni è restorazioni di strumenti, ani missu in anda i dui associ un serviziu di locazioni di piano, ineditu in Corsica. ‘Ssa pruposta hè prima pà i principianti chì volini appruntà una furmazioni senza investiscia subitu mezi impurtanti.

Ancu s’idda principia una nova aventura, cuntinuighja Juliana à fà i so giri in a Corsica sana da intratena i piano di i so clienti, è ni prufittighja “da scopra sempri loca novi è magnifichi.” Mentri ‘ssu tempu, travadda Nicolas in u so atteddu è accoglia l’aghjenti in a buttega.

L'Autori

Laisser un commentaire

Corsica.news

GRATUIT
VOIR