Lista Angelini: « Avanzemu »
Prisintata u 10 di maghju in Purtivechju, ma senza ch’iddi sighini cunnisciuti tutti i so membri, a lista di Jean-Christophe Angelini hè stata resa publica in a so integralità u 15 di maghju in Corti. Chjamata Avanzemu, rivindichighja un scopu chjaru: ghjunghja in capu, frà mezzu à l’atri listi naziunalisti, è divintà a lista cintrali in giru à quali si pudarà urganizà a nova maghjurità à l’Assemblea di Corsica..
Una di i so forzi, aldilà di … a so ubiquità è i so cunniscenzi di i cartulari maiò di a Corsica ughjinca, hè soca a so capacità à parlà senza chjachjari di i sughjetti più sinsibuli di u mondu naziunalistu isulanu, ancu sè u so discorsu pò fucalizà i critichi di una parti impurtanti di u muvenza d’indù hè sciutu. A sà bè ch’iddu li pò valè d’altri amicizii è sustegni. Cuncirnindu a nova urganisazioni clandestina, u Flnc Maghju 21, è u rigrettu chì ciarti pudariani d’avè pà a lotta armata, dici franca è chjara: “Non, pas de chemin dans cette direction”! Inquant’à l’implusioni di a cualizzioni Pè a Corsica, a diplurighja, dinunciendu una “tentation hégémonique ” di ciarti è a rumpitura unilaterali fatta da Femu a Corsica, ma ricunnosci chi “u bilanciu hè cullitivu , a rispunsabilità dinò”. Metti puri in mira, quì dinò à modu polemicu, u periculu ch’iddu idintifichighja indè una parti di i furmazioni di l’anziana cualizioni, indù dici chi “l’allégeance l’emporte sur la compétence”… S’iddu li pari nicissariu u ritornu criticu annant’à ciarti affari, ricusa puri d’insarrassi in polemichi parsunali è vò fighjulà l’avvena.
Discorsu di Jean-Christophe Angelini, ‘ssu sabbatu in Corti
Sè, pà d’altri furmazioni, bisognu ci hè, pà appruntà ‘ss’avvena, à fà un ricintraghju militenti è vultà à i fundamenti di a lotta naziunalista, un pocu persi di vista daretu à una visioni gestiunaria di a Corsica, u capilista d’Avanzemu pensa ch’idd’hè à l’incuntrariu indispinsevuli di scantassini da i posturi ideologichi, di falla finita incù i “totems, les vaches sacrées (…)et s’affranchir des pesanteurs en termes de stratégie et de pensée politique héritée du passé”. A strada impunaria l’apartura maximum annant’à persunalità steriori à u mondu naziunalistu: riprisentani più di 50% d’a lista, è vani da a dritta à a manca. L’unu di l’anziani membri di u gruppu di Jean-Charles Orsucci, Tony Poli, Prisidenti di a Cumunità di cumuni Castagniccia Casinca, hà ralliatu i ranghi d’Avanzemu, comu l’hà fattu dinò u merri di Sartè, Paulu Quilichini, chì veni iddu da a dritta. In quant’à u 63u di a lista, hè Paulu Scaglia, anzianu militenti naziunalistu, capu d’impresa aiaccinu, è monda prisenti in i sferi economichi isulani. Hè l’anzianu Prisidenti di u Tribunali di Cummerciu d’Aiacciu è di u CESEC, u Cunsigliu economicu, suciali di l »Ambienti è a Cultura.
Aldilà di i località indù a muvenza di u Pnc s’era arradicata da a so nascita, a lista Avanzemu assicurighja ch’idda hè sparghjata avà a so dinamica in a Corsica sana. In a so mira: turrà u punteddu maiò di “une alternative entre le statu quo nationaliste et un front républicain qui est refusé aujourd’hui par la majorité des Corses”… In quant’à a pussibilità di una allienza à u sicondu giru incù l’altri naziunalisti, in particulari i dui anziani partinarii di Pè a Corsica, dici Jean-Christophe Angelini ch’ùn’hè par avà dicisu l’affari, senza ricusà franca è chjara a so eventualità, ma puntendu u fattu chì a disunioni ùn vinindu micca d’iddu, ùn pò dumandà ch’idda cumpiessi… U primu scopu, pà iddu: crià l’evenimenti, a sera di u primu giru, è à parta si da tandu, pudè scambià u visu di a maghjurità tarrituriali. Avanzemu “saria u nomi di l’avvena”…
L'Autori
