Corse-Matin, trà pinseri è spirenza

0

Dopu à a morti di Bernard Tapie è a partenza d’u consortium CM Holding,  hè turratu u ghjurnali a pruprietà sclusiva di u gruppu La Provence. Hè pà ’ssu stessu gruppu ch’iddi s’impegnani in una guerra spietata dui giganti di l’industria. Da un cantu, Xavier Niel, fundatori di Free è multipruprietariu di media, da l’altru cantu Rodolphe Saadé, l’unu di i i principali traspurtadori marittimi mundiali. Pà i l’impiegati, a situazioni hè vista supratuttu à riguardu à ‘ss’ alternativa : o sarani tocchi da una ristrutturazioni, o pudarani cunsirvà i so impieghi…

Ramentu storicu

Pà capiscia tutti i cunsiquenzi di a sparizioni di Tapie annant’à l’avvena d’u ghjurnali corsu, bisognu ad intarissassi à u Gruppu La Provence. L’anzianu patronu di l’OM ni tinia 89% di i parti sin’à u 30 d’aprili di u 2020, quandi u tribunali di Bobigny hà missu i so sucità in liquidazioni ghjudiziarii. Hè pruprietariu Xavier Niel di l’11% chì fermani, hà dinò un drittu di prelazzioni annant’à l’altri parti è a capacità à ricusà un operatori novu. Un articulu di Le Monde, sciutu u 4 d’uttrovi, palisaia chì Niel avaria assicuratu ch’iddu cumpraria tutti i parti quand’iddu saria sparitu Tapie. Par avà, sò sempri in anda parechji pruciduri, ma i lei trà i dui omini, comu l’intaressi di Xavier Niel, lasciani pinsà à monda usservatori ch’idda era intesa l’affari di a ripresa dippò dighjà un pezzu.

De gauche à droite, Rodolphe Saadé, Bernard Tapie et Xavier Niel

Solu prublema, ma hè maiò : a pussibilità pà Niel d’uponassi à u riscattu d’u ghjurnali hè cuntistata da u liquidatori ghjudiziariu d’u gruppu Bernard Tapie (GBT). Hè almanaccata l’udienza summaria davanti à u Tribunali di cummerciu di Marsiglia u 21 di dicembri. Aspittendu, hè scambiata monda a situazioni e dopu à parechji ricessi, s’hè affaccatu un cumpetitori seriu : Rodolphe Saadé, PDG di CMA-CGM. Hè arradicatu in Marseglia ’ssu giganti di i trasporti chì hà 110 000 impiegati in u mondu sanu. A so sedi suciali – a torra CMA-CGM, a più alta di Marsiglia – hè lucalizata boulevard Jacques Saadé, chjamatu pà u babbu di u PDG ughjincu.

Corse-Presse pruprietà sclusiva di u gruppu La Provence

U cutidianu marsigliesu era nanzi pruprietariu di 51% di Corse-Matin ch’ùn hè più ligatu à Nice-Matin dippò u 1 di dicembri à l’infora di u nomi. I 49% chi fermani appartiniani à u consortium CM Holding, chì avia palisatu a vulintà di lascià li dippò ’ssa statina. Hè statu in fini cunfirmatu ‘ssu riscattu da Jean-Christophe Serfati, PDG di Corse-presse, u 30 di nuvembri.

A pruposta di CMA-CGM  

Rodolphe Saadé hà scuntratu u 26 di nuvembri i salariati di La Provence à u scagnu di u ghjurnali. Dopu à ’ssu scontru, in una lettara à l’impiegati fatta u 30 di nuvembri, hà ramintatu u so « attaccamentu pà La Provence e Corse Matin », prumittindu un investimentu cunsequenti e u ritornu à l’equilibriu di i dui tituli da qui à 2026. In casu di riscattu, hà assicuratu u PDG ch’idd’ùn ci saria micca pianu di licenziamentu economicu è ch’iddu mantinaria in Marseglia a stamparia di La Provence, com’à l’attività di Corse Matin indè l’isula. Bramaria dinò a crescita di i ricetti di diffusioni pà via « d’u sfruttamentu di l’uppurtunità d’u numericu ». S’idd’hè ritinuta a so ufferta, Rodolphe Saadé s’impegnaria à metta in anda « reguli stritti » pà guarantiscia l’independenza di a ridazzioni. Bisognu à fà contu chì CMA-CGM, principali impiegatu d’u settori privatu in Marseglia, hà fattu prò di a ripresa mundiali di i scambii incù un beneficiu nettu chì s’hè alzatu à 5,6 miliardi di dollari pà u terzu trimestri di quist’annu.

A strategia di Xavier Niel

In u 2019, quandi Niel hà cumpratu 11% di La Provence, ognunu hà matriculatu : chì intaressu pudia d’avè u finanzieri, coazziunariu di u Monde, in Marsiglia ? Hè solu dopu ch’idda s’hè schiarita a so strategia. In qualchi mesi, hà cumpratu Nice-Matin, France-Antilles è Paris-Turf. S’intarissighja à tempu à La Marseillaise, ghjurnali cumunista in liquidazioni, pà quali hà fattu una ufferta cunghjunta incù La Provence, nanzi di ghjittà a spugna finalmenti. Invistisci dinò da parechji anni in i web media d’urizonti pulitichi sfarenti, Mediapart, ElectronLibre e Causeur.

L’omu d’affari tissa a so tela in u paisaghju mediaticu indù hè crisciuta monda a so influenza. U so uggettivu hè à tempu d’arridrizzà i finanzi di tituli di a stampa à fiatu in bucca dippò u sviluppu d’u numericu è tocchi in più da a crisa sanitaria. Duvariani uparà parechji trasformazioni, incù una urientazioni franca è chjara in u numericu. À a seguita di u riscattu di Nice-Matin, annu scorsu, hè statu prupostu un pianu di partenzi « vuluntarii » è duvaria cuncirnà più di 110 salariati, trà quali una trentina di ghjurnalisti, annant’à l’850 impieghi di u gruppu. A crisa sanitaria avaria par altru lasciatu un tavonu di parechji millioni d’euro in u bilanciu privisiunali di l’impresa di stampa. Pà fà ecunumii, hè evucata a criazioni d’una stamparia nova in u Var, chì saria cumuna incù La Provence. ’Ssu centru chì apraria da quì à u 2024, pudaria rializà edizioni pà d’altri media. Hè stata cunfirmata ’ss’infurmazioni da a dirizzioni di Nice-Matin, in un articulu di L’Express.

Corse-Matin in u rossu

U gruppu Corse-Presse chì hè editori di Corse-Matin conta più di 200 impiigati. Di ghjunghju di u 2021, in una lettara interna à i salariati cunsultata da l’Afp, l’Intersindicali d’u ghjurnali puntaia un deficit di 4 millioni d’euro in u 2020. Di luddu, hè sciutu un cummunicatu intitulatu « 200 impieghi minacciati ». Palisaia chì macaru i dui piani di partenzi vuluntarii urganizati in trè anni, da riducia a massa salariali, ùn si saria manc’appena ristabilita a situazioni finanziaria di u titulu.

A riguardu à a diffusioni, dici l’ACPM (Alliance pour les chiffres de la presse et des médias) ch’iddu hè passatu u ghjurnali da più di 45000 esempiarii pagati in u 2005 à 25000 in u 2020, trà quali 20% in numericu, incù una perdita sicca di 11% pà l’annu in corsu.

L’ombra di France-Antilles

A vinuta di Xaxier Niel à i cummandi significaria senza dubbiu trasfurmazioni maiori. À France-Antilles, u riscattu di u gruppu dopu liquidazioni avia permissu di salvà 126 impieghji annant’à 235. Era puri stata monda impattata a publicazioni. Piantata di friaghju di u 2020, avia ripiddata, ma suttu a forma numerica, in u mesi d’aprili, nanzi ch’idda sighi fatta una publicazioni nova di u cutidianu in a statina. U titulu, chì cuntaia à l’iniziu trè versioni stampati (Martinique, Guadeloupe è Guyane) n’hà solu dui avà. France-Guyane hè dispunibili solu in numericu.

Chì avvena pà l’impieghi in Corsica

S’iddi parini missi in anda mezi culussali pà crià una « super imprimerie » in u Var, hè pussibuli ch’idda sighi missa in periculu quidda di Lucciana chì pruduci a noscia stampa cutidiana righjunali, ditta PQR da l’acronimu francesu. Più d’una vintina d’impieghi li sò ligati. Una situazioni ch’iddu suvitaria da vicinu Gilles Simeoni. Ci ani dittu i nosci infurmatori ch’iddu si saria intratinutu u Prisidenti di u Cunsigliu esecutivu in a statina incù Jean-Christophe Serfati, PDG di Corse-Presse e omu di fiducia di Bernard Tapie. U scontru avaria cuncirnatu l’avvena di u titulu ma dinò una ristrutturazioni nicissaria. Tempu à ’ss’appuntamentu, saria stata evucata a situazioni futura di ciarti rispunsevuli di Corse-Matin, trà quali Roger Antech, dirittori di publicazioni d’u ghjurnali. Cuntattattu da a noscia ridazzioni, hà cunfirmatu Gilles Simeoni ch’idd’avia scuntratu à Serfati, trattendu di l’avvena di l’impieghi di Corse-Presse, ma hà assicuratu chì a discussioni ùn avia micca cuncirnatu i dirighjenti d’u ghjurnali. S’iddi si facini contu à i nosci ultimi infurmazioni, Roger Antech pudaria essa numinatu da quì à pocu in Marsiglia.

In a battaglia trà i dui miliardari, pari monda più attrattiva l’ufferta di Saadé, ma bisognu ci hè à aspittà a decisioni di u Tribunali di cummerciu di Marsiglia. S’idda hè à prò di Xavier Niel, tuccarà à u liquidatori ghjudiziariu à dalli a dirizzioni di l’impresa, senza chì Saadé, macaru a so putenza, ùn possi upponassi à ’ss’arrigulamenti.  Si ni saparà di di più u 21 di dicembri.

L'Autori

Laisser un commentaire

Corsica.news

GRATUIT
VOIR